ORANJESTAD (AAN): E siman aki, sr. Arthur Giel, presidente di e asociacion “Union di Piscadonan Aruba”,
alavez tambe presidente di fundacion Centro di Pesca Hadicurari, tabata tin e placer pa reparti na varios representantenan di diferente distrito, centro y grupo di piscado rond Aruba, varios caha di pakete di Sekat di pia (pulpo) pa uza como has.
Tabata un comerciante local kende a desea di keda anonimo, a hay’e cu un situacion fastioso unda un cantidad di caha di un producto cu ya no por ser bendi y uza pa consumo mas. Pa no hay’e obliga na destrui e cargamento, e comerciante bon samaritano a puntra si e piscadonan lo por haci uzo di e Sekat di pia (pulpo) como has pa pisca.
Asina ey, den forma relampago a obra pa conecta cu diferente piscado rond e isla pa reparti e has via di e centronan aki. E regalo aki sigur ta un gesto cu lo yuda piscadonan mirando cu has ta un di e gastonan grandi pa piscadonan por produci pisca fresco pa bende cu pueblo.
Riba e potretnan por mira momento cu a haci entrega na sr. Nel Maduro di Rancho di Nel na Barcadera. Na sr. Glembert Bislip di Spaans Lagoen.
Na Savaneta, tanto sr. Chiki Soliana y sr. Wouters a ricibi e Sekat di pia pa tur e piscadonan di e area. Na Cura Cabay, sr. Ruben Willems di Fundacion Centro Di Pesca Cura Cabai a keda di reparti e cahanan cu piscadonan di Cura Cabay y becindario.
Sr. Buchi y Techi Briesen a ricibi pa piscadonan di area di Santa Cruz y por ultimo a entrega na Milton Tromp y Chicks Pontilius entre otro pa piscadonan di Noord y vecindario.
E comunidad di Piscadonan di Aruba semper ta uni y ta comparti cu otro piscadonan y conciudadanonan. Un palabra di danki ta bay na e comerciante anonimo pa e bunita y balioso gesto aki. Danki tambe pa tur e representantenan cu ta yudando reparti esakinan.
https://diario.aw/categories/noticia/general/monton-di-piscado-rond-aruba-a-ricibi-sekat-pa-uza-como-has#sigProIda5c99042b9