Directie Luchtvaart ta informa:
ORANJESTAD (AAN): Riba dia 28 di november 2025 e autoridad di aviacion Europeo (EASA) a emiti un directiva tecnico obligatorio (“Airworthiness Directive”) cu ta aplica pa avionnan tipo Airbus A320. E directiva aki ta instrui usuarionan di avionan Airbus A320 pa reemplaza/modifica un pieza (“elevator aileron computer”) prome cu e siguiente vuelo. E computer aki ta controla e movemento di nanishi (ariba/abao) y hala (ariba/abao) di e avion. Ta premira cu e directiva aki lo ta aplicabel pa un gran cantidad di e avionnan A320 den servicio mundialmente, y tur avion afecta lo mester wordo para pa por haci e modificacion.
“Airworthiness directive” y seguridad
Den mundo di aviacion e ta algo comun cu un directiva asina ta wordo emiti. Esaki ta wordo haci pa mehora e seguridad di e tipo di avion concerni, a base di feedback operacional. Loke no ta hopi comun ta cu un cantidad grandi asina di avionnan ta wordo afecta na mes un momento, manera awor ta e caso. Mester bisa cu e avionnan tipo Airbus 320 cu si ta keda bula ta avionnan cu no ta afecta door di e directiva, of ta avionnan cu a wordo modifica caba segun e directiva. Tambe ta importante pa trece dilanti cu en general e avion tipo Airbus A320 riba su mes ta un avion sigur cu un bon safety record.
Efecto pa Aruba
E avion tipo Airbus A320 ta un di e avionnan mas uza na mundo. Door cu e biaha aki un cantidad asina grandi di e tipo di avionnan aki ta afecta, esaki lo tin como consecuencia cu aerolineanan afecta lo haya nan mes ta cancela cierto vuelonan.
Aruba lo no ta un excepcion, lo por spera algun vuelo pa Aruba wordo cancela, door cu e tipo di avion Airbus A320 ta hopi uza pa vuelonan pa Aruba door di diferente aerolineanan. Ta premira cu e situacion aki lo dura por lo menos un pa dos siman. Pa e motibo ey ta conseha pasajeronan di aerolineanan cu ta usa e tipo di avion aki pa keda den contacto cu nan aerolinea y tambe pa monitorea e website di nos aeropuerto.
