Prome Minister Mike Eman:
ORANJESTAD (AAN)—Prome Minister, señor Mike Eman, den entrevista cu Matutino DIARIO a sigui splica cu e situacion entre Merca y Venezuela, no ta algo cu gobierno di Aruba ta ‘busca noticia’ pasobra e ta un noticia cu por hinca Aruba mas envolvi cu nos ta.
“De facto e no ta algo di nos y pa e motibo ey nos ta cauteloso tambe, pasobra via di noticia por envolve nos pais den algo cu no ta parti di nos” e dignatario a reitera cu enfasis.
Mirando cu mas di 80% di Aruba su pilar economico ta bin di e turismo proveniente di Merca, y cu nos Isla ta un bisiña hopi cerca di Venezuela, esaki ta crea un preocupacion grandi den nos comunidad.
Segun Premier Eman, di tur analisis cu por wordo haci, a base di con tur e movecionnan ta, e ta mustra cu Merca tambe ta tene cuenta cu ne, y por mira con e lineanan di avion y botonan ta coriendo, teniendo cuenta cu e proteccion di nos Islanan, pa no involucra nan den un problema cu realmente no ta di nos. “Mi ta prefera pa den esey tin cierto delicadeza, pa locual ta trata e impresion cu ta wordo crea cu no ta uno cu por trece e problema aki demasiado cerca di nos, pero no mas cerca di loke ta necesario. Hulanda ta comunica esaki tambe na Merca, y logicamente ora cu e Consul di Merca a bishita nos, nos a expresa tambe cu cualkier inkietud y turbulencia den e region por tin efectonan riba nos trankilidad y nos turismo”, e dignatario a subraya.
El a señala cu gobierno ta pone hopi enfasis riba con nos isla ta sali pafo pa no haci Aruba mas parti di algo cu e no ta parti di dje.
“Por tin critica, por ta medionan di comunicacion of otronan kier por tin mas noticia cada rato riba e tema aki, pero na nos evaluacion, ta mas cauteloso door di no envolve Aruba door di continuamente, duna opinion riba algo cu realmente no ta toca nos”, Prome Minister a bolbe remarca.
