Miss Universe Organization ta bay acepta muhernan casa y tambe mamanan pa participa

Entrante certamen di 2023

ORANJESTAD (AAN): Den fin di siman, president di Miss Universe Organization a manda un email pa tur National Directors rond mundo, pa bisa cu awor e certamen di beyeza ta bay cuminza acepta damanan cu ta Mama, y tambe esnan cu antes tabata Casa, of cu awor ta Casa ainda, pa participa pa e corona maximo entrante 2023.

    E email a wordo manda door di CEO di e organizacion, esta Emy Emmerich, unda e ta splica cu Miss Universe Organization semper a forza su mes pa evoluciona cu tempo pa representa y apoya mihor posible e muhernan na nivel mundial.  Como parti di e siguiente paso den e evolucion aki, a dicidi na bin cu e siguiente cambionan.

   Entrante e di 72ndo certamen di Miss Universe y di e certamennan preliminar nacional cu ta wordo teni prome cune, muhernan cu ta of tabata casa, y tambe muhernan cu ta na estado of cu tin yiu caba, lo por bay competi tambe.

   E email a añadi cu e decision a wordo basa riba encuestanan cu nan a haci na comienzo di aña, y e “datonan recien” cu a mustra cu e “edad promedio di muhernan pa casa y sali na estado pa prome biaha na nivel mundial ta cuminza cu 21 aña”.

   “No obstante e diferencia di nos cultura- y creencianan, esaki ta permiti tur muher pone e destino den nan man y nos lo acomoda ken sea ta Miss Universe e ora.  Nos ta spera di por duna bon bini na mas muher cu aspiracion den comunidad como resultado di e cambionan nobo aki.  Nos kier a comparti esaki cu boso awor, mientras cu preparacionnan lo cuminza pa boso certamennan local pa 2023.”

   E email a indica cu e organizacion lo bay tene un reunion tipo ‘Town Hall’ cu tur National Directors for di rond mundo na luna di September venidero.

   Ya caba a cuminza acepta: Apenas algun rato despues cu e email a circula, ya varios organizacion di e certamen na diferente pais, e.o. Miss Universe Colombia, Miss Universe Honduras, Miss Universe Republica Dominicana, Miss Universe Filipinas, Miss Universe Malta, a haci nan propio anuncio pa confirma cu nan tambe lo cuminza acepta Mama, of muhernan casa of divorcia tambe pa e certamen.

   E organizacion di Miss Universe Colombia tabata un di e prome cu a reacciona, y esaki a laga hopi hende sorprendi.  E ora poco-poco a bin realiza cu ta un cambio mundial ta pasando.

   E reaccion di publico tabata basta positivo.  Nan ta haya cu porfin Miss Universe Organization a bira realista y ta adapta su mes na cambionan mundial.

   Algun cu tin duda: Pero tin otronan, incluyendo ex-Miss USA, esta Deshauna Barber ta pensa cu si acaso un Mama sali ganadora di e certamen, e hecho cu pa un aña largo e lo tin un schedule hopi pisa di viaha diferente parti rond mundo, pa presenta na diferente evento, show, presentacion, y ocasion festivo pa e organizacion, lo por cay duro.

   “Awor cu ta bay permiti muhernan na estado y muhernan cu yiu, ta un tiki confuso pa mi, pasobra e titulo ta rekeri viahamento constante y un agenda hopi preta durante henter aña.  Mi no ta compronde con bo por fungi como un mama durante e tempo ey.”

   El a bisa cu hasta un Miss cu wordo eligi y e ta den un relacion, ta casi imposible pa sigui cu esey, y pa tal motibo hopi dama cu a sali corona como Miss USA of Miss Universe, ta cuminza nan titulo den un relacion, pero mayoria vez na final ta baha corona y nan ta soltera bek.  Pues muchanan añadi na e responsabilidad ta parce di ta un poco irealistico pa e tipo di titulo y compromiso aki,” Deshauna Barber a declara.

   Alicia Machado kende na 1996 a haya e titulo representando Miss Venezuela, tambe a duna su opinion riba social media encuanto e cambio di regla aki. 

   Machado a bisa, cu si acaso un dama casa gana e titulo, e kier wak ta con hopi e esposo lo keda cune.  Si un dama na estado gana e titulo, y e duna luz durante e aña di su reinado, e kier sa ta ken ta bay cuida e baby, y tambe kico e lo haci den e minimo 3 luna di zwangerschap verlof.

   Alicia Machado a comenta, cu e obsesion pa inclusion ta ‘desvirtua’ algun concepto.

   Hopi hende a comenta cu nan si ta di acuerdo cu e cambionan di regla aki di Miss Universe Organization, pasobra acaso un muher casa of mama no por ta e muher mas bunita di mundo?  Toch ta evalua su fisico y su capacidad personal toch.  Pues kico tin di haber su estado civil.