ORANJESTAD (AAN): Informacion procedente di Curaçao, ta indica cu Consulado General di Merca na Willemstad,
a anuncia yegada di Ramon ‘Chico’ Negrón, kende ta bira e persona Encarga di Negoshinan (‘Chargé d’Affaires’) di Consulado General di Merca na Curaçao, y Mision pa Aruba, Bonaire, Curaçao, Saba, St. Eustatius y St. Maarten.
Señor Negrón ta un Oficial Superior di Servicio Exterior di US Department of State. El a asumi su puesto como Chargé d’Affaires ora cu el a yega Curacao riba Diamars 18 di Februari 2025. Negrón lo bay cubri e funcionnan di Consul General y Hefe di Mision, awor cu Consul General John McNamara ta riba un mision temporal pa lidera e Embahada Mericano na Bogota.
El a nace y crece na San Juan (Puerto Rico), y Negrón tabata diplomatico pa 26 aña caba, y mas recien tabata Director di Strategia di Hemisferio Occidental na e National Security Council. Su trabaonan anterior tabata Guadalajara (Mexico), Bern (Suiza), White House Situation Room na Washington, Havana (Cuba), Director di US Regional Embassy Office na Basrah (Irak), Deputy Economic Counselor na Canberra (Australia), Director di International Narcotics and Law Enforcement Sections na Panama y Pakistan, Deputy Economic Counselor na Beijing (China), y Economic Counselor na Embahada Mericano na Bogota (Colombia).
Negrón a sirbi tambe den Ehercito Mericano pa mas di 22 aña, riba servicio activo y como reservista, y a retira cu e rango di Lieutenant Colonel. El a ricibi un Bachelor of Science di US Military Academy na West Point, y un titulo di Masters den International Economic Policy for di Columbia University. E por papia Spaño, Frances, Portugues, Aleman, y Chines. Su casa Debra tambe ta un Foreign Service Officer, y nan tin dos yiu muher. Palabra di exito na Sr. Negrón cu su puesto nobo.
