Pastoor Paulus tabata un Pastoor hopi activo. Na Parokia di Noord Pastoor Paulus a yuda recauda fondo pa remplasa e dak di palo di maishi di e misa di Noord pa dak di panchi.
Den un poco tempo Pastoor Paulus a logra esaki. Awor Pastoor Paulus tin un otro mision: Construi un misa na Santa Cruz. For di 1950 Pastoor Schemer a haya un pida tereno pa construi un Misa, un pastorie y un school na Santa Cruz.
Pastoor Paulus ta tuma encargo. Tabata tin un necesidad grandi pa un Misa, school y Pastorie. Pastoor Paulus a pidi yudansa di diferente hende y asina algun persona tabata yuda cu placa y cu trabao.
E Hende hombernan tabata busca piedra den mondi den cercania y carga trece cu burico. Pastoor Paulus mes cu tabata un carpinte y metsla tabata supervisa e trabao y tin bes Pastoor mes tabata traha. Despues di 6 siman a keda cla cu e misa.
Un edificio di 70 pia largo di muraya di piedra y dak di palo di maishi. Despues di a paga tur gasto ainda a resta tres florin. Asina Santa Cruz ta conoce su prome edificio di misa na 1852. E Hendenan di e tempo ey tabata yam e Misa di Santa Maria. A keda usa e nomber pa e misa te cu 1863.
Na 1853 Pastoor de Vries ta cuminsa yuda cu Pastoor Paulus den trabao di celebracion di misa y despues ta sigui cu e trabaonan di Pastoor Paulus.
Diabierna 1 di Mei 1863 ta bendiciona e misa na su nomber nobo Maria Inmaculada Concepcion y Pastoor di Vries ta bira e prome pastoor di Parokia di Santa Cruz. Esaki tambe ta e fecha oficial cu a funda e Parokia di Santa Cruz.
E prome baby mucha muher cu a wordo bautisa ( 4 di mei 1863) den e parokia recien funda tabata Maria Lampe, Yiu di Joseph Lampe y Elizabeth Vrolijk.
Na e momento aki (2022) Pastoor Jairo Maduro, un Arubiano, ta e Pastoor di Parokia di Santa Cruz. Prome cu Pastoor Jairo Maduro tabata Pastoor Rey tabata Pastoor di Santa Cruz y prome cu Pastoor Rey tabata Pastoor Felix Pasadilla tabata Pastoor di Santa Cruz.
Compila pa Roberto Croes
Nos Historia Nos Herencia
