ORANJESTAD (AAN): Na Biblioteca Nacional di Aruba (BNA), dialuna dia 15 di December tin e presentacion di buki cu ta trata ‘70 Aña di Statuut’.
E buki ta di e autor mr. dr. Rene Rosalia y a sali na 2024. Señor Rosalia ta un persona hopi conoci como politico na Corsou y tin hopi publicacion riba mercado.
Den un entrevista cu DIARIO, señor Mirto Lacle a conta den corto e historia di Statuut y e tempo prome cu Statuut y a remarca cu esaki ta e expectativa tambe di e presentacion di dialuna unda cu señor Rosalia lo ta presente. Den cuadro di 7 decada, señor Rosalia, lo bay bek den e tempo hopi prome cu Statuut a bin na existencia. E lo splica kico ta Statuut, kico e a encera, y con Hulanda a crea Statuut y kico tabata e beneficionan, ventaha y desventahanan di e islanan cu tabata forma parti di Antia Hulandes.
Invitacion ta keda na pueblo en general pa bishita e presentacion aki dialuna 15 di December na Biblioteca Nacional Aruba, di 6:30 pa 9:00 pm. E buki ta ‘70 Aña di Statuut obtenibel e anochi aki.
