Mira con bunita e hardin di alimentacion a bira na St. Paulus School

Den 2 luna di tempo

ORANJESTAD (AAN): Siman pasa a marca exactamente 2 luna despues cu na St. Paulus School na San Nicolas a crea nan mesun hofi di fruta y berdura.

   Por mira cu mayoria di e matanan ta alegre, contento y a cuminsa produci berdura manera zuchini, concomber y concomber chikito. E zonnebloem a floria bunita y tin mas cosecha na caminda.  E proyecto di agroforesteria aki a bira posibel danki na Living Soil Aruba, den colaboracion cu Santa Rosa, y tambe Ministerio di Ursell Arends.

   Y e studiantenan a keda asombra pa mira cuanto berdura nan hardin ta produciendo.

   Segun e cabezante, e proceso di colecta awa di airco tambe ta cana un poco mas mihor y tur dia nan ta colecta por lo menos 80 gallon di awa (como 320 liter di awa).  Pero scol a indica cu e colect ey ta hopi trabao. Nan mester boluntario y un inversion pa haci e proceso di colecta e awa di airco mas efectivo y menos trabahoso.

   St. Paulus School a indica cu nan tin un persona cu ta yuda nan 1 bes pa siman y nan lo aprecia 1 mas cu por yuda durante siman.

    No tene miedo. Contact scol si bo ta interesa pa yuda of kier inverti den e proyecto.  St. Paulus School ta situa net pariba di e muraya di Joe Laveist Sportpark.