Ministronan a firma Decreto Ministerial pa ‘Scol Saludabel’ haya un empuhe mas

Nos futuro generacion ta bin cu bida saludabel

ORANJESTAD (AAN): Den Pelical Ballroom di Hyatt Place Aruba, a tuma lugar Diaranzon atardi e firmamento oficial di e Decreto Ministerial, pa e Stuurgroep Nobo di e programa di ‘Scol Saludabel’ pa Aruba.

   E meta di Scol Saludabel Aruba ta pa concientiza hobennan mas di un estilo di bida saludable y pa adapta nan comportamento pa promove escogencianan saludable y responsabel.

   Si for di chikito bo siña e muchanan con pa cuminza come na forma mas saludabel, esaki lo bay tin beneficio pa nan pa resto di bida, y alavez lo por yuda reduci e cantidad di hendenan cu ta cana rond riba e isla cu un malesa cronico, manera diabetes, presion halto, of malesa di curazon.

   Te cu awor ta algun scol na Aruba so ta participando den e proyecto di Scol Saludabel.  Siendo cu e proyecto aki a nace for di aña 2011 caba cu diferente rapport y plan pa start esaki.  Hecho ta cu awor cu e ta cuminza draai bon, y cu e scolnan ta notando hopi exito cune, e momento a yega pa esaki bay cuminza wordo implementa posiblemente na tur scol.

   Un docente di Cacique Macuarima Scol y tambe di Mon Plaisir School a duna un resumen di e exito cu nan ta logrando caba cerca nan alumnonan, y a ricibi aplauso completo di publico.

   Cu e funcion di Scol Saludable, ta siña e muchanan riba tur componente di salud, y ta alinea e situacion di salud di e alumno y docentenan, e necesidadnan y deseo di scol.  Pero e ta exigi participacion activo di e mayornan tambe.  Pues cuminza duna muchanan almuerzo saludable pa hiba scol, y baha man na pone Hotdog, Pastechi, of Donut den nan baki di cuminda.

   Pero e aspecto di Scol Saludabel no ta encera djis mustra e alumnonan con ta come mihor, sino cu tin di trece cambio tambe na ehercicio, y trata di cambia nan mentalidad riba aspecto di comemento.

   Diaranzon atardi durante e ocasion special, tabata presente diferente funcionario di area di Salud Publico, di Educacion, y di Asuntonan Social.  Tambe a duna danki na tur miembro di e Stuurgroep y e funcionarionan laborando como ‘Gezonde School Adviseur’ (GSA).

   Aruba lo mester di mas di e funcionarionan di GSA aki den servicio, si acaso ta bay busca mas Scol pa uni cu e proyecto di Scol Saludabel.

   A duna danki tambe na tur e scolnan cu ta formando parti na e programa aki, esta representantenan di Imelda Kleuterschool, Scol Preparatorio Washington (tabata ausente), Cacique Macuarima School, Mon Plaisir School, St. Dominicus College, St. Franciscus College, Pius X School, Prinses Amalia Basisschool, Scol Primario Kudawecha (tabata ausente), St. Paulusschool (tabata ausente), y Scol Basico Dornasol.