Ministro Xiomara Maduro a reuni cu Anna Paolini como representante nobo di UNESCO pa Caribe

ORANJESTAD (AAN): Recientemente un grupo grandi di Nacionnan Uni tabata na Aruba pa asina cera conoci cu Conseho di Ministronan

y tambe cu diferente instancia na Aruba, pa asina por fortifica e lasonan di trabao y asistencia cu nan por brinda na Aruba.

   Den cuadro di e bishita aki, Minister Maduro di Cultura a reuni cu señora Anna Paolini cu ta e representante nobo di UNESCO pa region di Caribe. E reunion a tuma luga cu presencia di Secretario Generaal di UNESCO na Aruba, señora Marushka Tromp y sr. Marck Oduber cu ta e specialista encarga cu e parti di ciencia pa e Secretariado di UNESCO na Aruba.

   Señora Paolini a haci uzo di e reunion pa asina presenta su credencialnan oficial na Minister Maduro y tambe pa conta mas di e cambionan cu a tuma luga den UNESCO pa e forma di brinda asistencia na e Paisnan den Caribe. Como miembro asocia di UNESCO, Aruba lo worde yuda cu asistencia via e oficina di UNESCO na Jamaica.

   Minister Maduro ta gradici señora Paolini pa e bon relacion  y asistencia cu Aruba a bin ta haya di UNESCO, unda recientemente cuater scol na Aruba ta participando den e netwerk di scolnan di UNESCO na unda alumnonan ta siña mas di e 17 metanan di desaroyo sostenibel di Nacionnan Uni.

   Pa por sa mas kico e Secretariado di UNESCO ta haci na Aruba, Minister Maduro ta invita pa mira e segunda di parti di e programa informativo riba UNESCO cu lo pasa Dialuna dia 13 di februari 2023 pa 7’or di anochi na Telearuba y Diamars dia 14 di februari pa 8’or di anochi na DiarioTV.