ORANJESTAD (AAN): Siman nobo ta cuminsa y nos ta reuni cu representantenan di TWO Nederland pa discuti e progreso y
e siguiente pasonan den desaroyo di proyecto HART (Herinrichting Aruba Raffinaderij Terrein), cu ta enfoca riba e futuro di e terreno di refineria na San Nicolas.
Nos ta papia di un terreno cu tin un gran potencial pa contribui na diversificacion di e isla su economia, atrae inversionnan y crea oportunidadnan economico nobo pa San Nicolas y Aruba.
Pa realisa e potencial aki, ta esencial pa Gobierno traha cu un vision cla, un planificacion solido y decisionnan basa riba investigacion y informacion tecnico confiabel. E cooperacion cu TWO Nederland y expertonan internacional ta importante pa prepara diferente posibilidadnan di desaroyo y determina e direccion mas beneficioso pa nos pais.
Nos meta no ta simplemente duna un terreno un uzo nobo, sino crea un futuro economico nobo. Un futuro den cual San Nicolas por beneficia di mas actividad economico, mas oportunidad pa e empresarionan y un desaroyo sostenibel cu tin balor pa generacionnan venidero.
E transformacion di e terreno di refineria ta un proceso cu ta exigi vision, perseverancia y cooperacion. Nos compromiso ta pa sigui traha di manera structura y responsabel pa transforma e potencial aki den oportunidadnan concreto pa Aruba.
San Nicolas tin un futuro, y Ministro ta traha pa duna e futuro ey forma.
