Ministro Ursell Arends ta pidi pueblo pa ta cauteloso pa temporada di calor excesivo

ORANJESTAD (AAN): Awor cu e ciclon Ernesto ta na rand di Caribe, a pone cu ya desde Diamars anochi caba bientonan a mengua.  

Diaranson tabata un dia cu casi nada di biento, y e lo ta mescos awe Diahuebs tambe.

   Aruba ta experenciando un periodo di calor excesivo cu temperaturanan di entre 34º pa 36º Celsius durante dia y un indice di calor di hasta 44º C cu ta indica e nivel di calor percibi pa hende (‘feels like’).

   Nivelnan halto di humedad, combina cu un alivio minimo durante anochi por conduci na incomodidad y hasta riesgonan pa salud. E temporada aki lo continua pa lunanan di augustus, september y october.  

    E situacion di temperaturanan extremo ta worde empeora door di cambio climatico cu ta hisa e frecuencia y intensidad di olanan di calor mundialmente.  

    Pa siguridad durante e periodo aki ta esencial pa tuma algun precaucion:  (1) Keda hidrata: Bebe suficiente awa y evita bebidanan cu hopi sucu. (2) Limita actividad pafo: Limita actividad fisico pa oranan di mainta of anochi ora ta mas fresco.

   (3) Busca sombra of ta paden: Keda den ambientenan cu airco ora cu ta posibel.  (4) Bisti adecuadamente: Paña los cu colornan cla ta yuda mantene bo curpa fresco. (5) Uza protector solar (sunblock): Proteha bo cuero di rayonan ultravioleta(UV) intenso door di hunta protector solar regularmente. 

   E medidanan aki no solamente ta crucial pa comodidad pero tambe ta yuda preveni problemanan di salud ocasiona pa calor cu lo por asta pone bo bida na peliger. Esaki ta conta specialmente pa mucha chikito, adultonan mayor y esnan cu problema si curason.  

   Ministerio di Transporte, Integridad, Naturalesa y Asuntonan di Adulto Mayor ta urgi tur ciudadano pa tene nan propio bienestar y di otronan na cuenta durante e temporada di calor excesivo aki.

   DIARIO a ricibi reaccion di pueblo di e.o. Westpunt, Bubali, San Miguel cu nan ta preocupa cu net awe Diahuebs, cu e compania Elmar ta planea pa corta coriente entre 7 pa 8 ora largo den e barionan aki, pa haci trabao di mantenimento riba wayanan y tambe transformatorhuis.