Marisol tabata den tur partido cu a yuda produci e huma di Serlimar --- *DIARIO prepara pa un comedia tristo di politiconan cu a origina e drama --- *Benny y dos Mike por splica pakico no a considera Serlimar infrastructura
ORANJESTAD (AAN) — Awe e dia a yega pa Ministro Ursell Arends discuti Serlimar cu Miembronan di Parlamento di Aruba.
Na momento cu nos a dicidi cu Serlimar sigur ta un topico cu mester analisa den edicion di awe, nos kier a extende na Ministro Ursell Arends nos sincero deseonan di forsa pa e por enfrenta e team brabo di Oposicion, cu sin duda mihor cu Ministro Ursell Arends mes, por splica Pueblo kico a pasa cu Serlimar y pakico cualkier comerciante den sector priva, for di prome cu 2017 lo a declara e compania di Aruba bancarota.
Si awe nos ta pensa cu Serlimar mester ta un asunto cu mester wordo analisa, ta pasobra den e huma di Serlimar por topa mas cu producto di candela den cual sushi ta kima.
Den e huma di Serlimar por topa cu berguensa politico, cu ta haci cualkier difunto, lo a prefera di bolbe muri prome cu mester bolbe habri boca pa splica kico a pasa cu Serlimar.
Uno di e politiconan cu mas por papia di Serlimar, ta keda naturalmente Marisol Lopez-Tromp, cu a crea e historia politico mas sabi cu Aruba a conoce.
Marisol a pasa un rato den tur partido di Aruba, pero aparentemente e tabata e damita mas santo den henter e historia politico di Aruba, manera e Cas di Ma Dushi na Noord por splica.
Esaki ta haci cu Marisol por splica con cada partido politico na cual el participa (cu ta oficialmente casi tur) a atende cu Serlimar.
Marisol ta uno di e miembronan di Oposicion, cu tabata tin Serlimar den su man.
Pa analisa kico a pasa cu Serlimar, mester pasa un rato den compania di Mike de Meza, e gran politico di e fracaso di Citgo, cu mester atende e asunto sigur cu su amigo di partido, cu ta Benny Sevinger, cu a topa cu un avestruz den asunto di tereno.
Benny Sevinger y Mike de Meza tabata “back to back” di Mike Eman, cu a bolbe Parlamento y asina por splica Aruba awe, pakico e no a usa aunke ta un parti chikito di e fondo di 1.6 Biyon pa Serlimar, cu sigur ta cay bou infrastructura di Aruba.
Si Mike no tabata kier a uza parti di su Fondo di 1.6 Biyon (su hendenan den Parlamento oficialmente a entrega su Gobierno 1.6 Biyon di Pueblo), e por a uza parti di e debe nacional pa awe evita cu Serlimar ta den problema.
Pa haci un historia cortico, nos ta trata di analisa pakico awe Ministro Ursell Arends, mester bin splica kico tin tras di e huma di Serlimar, si e no tin e conocemento directo di loke a pasa cu Serlimar den historia.
Tin un posibelidad tambe cu awe Parlamento lo bira sitio di un milagro y miembronan di Oposicion cu a yuda destrui Aruba y a laga hasta cara di Aruba lastima, ta splica Aruba kico nan a haci pa Serlimar.
Mester bini un conclusion pa Serlimar y nos bista ta fiha na e momentona aki riba Ministro Ursell Arends, e politico nobo cu mester splica tur hende cu tabata riba e barco di Serlimar un dia, kico a pasa cu nan riba e barco.
Increibel pero berdad den e mundo misterioso di politica cubri pa un parti cu huma di Serlimar, cu na landfill ta causa desaster pa Pueblo y na mes momento ta kima sushedad cu asina ta bira invisibel.
