ORANJESTAD (AAN): Manera probablemente ya ta conoci EPB San Nicolas ta encarga cu enseñansa di ofishi basico na Aruba.
EPB San Nicolas tin como un di e metanan principal pa forma principiante den ofishi pa un comunidad cu ta den cambio constantemente.
Fuera di un curriculo actualisa tambe ta brinda den un forma integra principio di “competentiegericht onderwijs”. Den esaki experiencia di trabou ta di suma importancia pa e alumno.
E situacion di COVID 19 na Aruba ta forma un reto pa nos tur y den esaki scol y comercio no ta un excepcion. EPB ta evaluando e posibilidad pa continua e periodo di pasantia pa e alumnonan di klas 4 como cu nan lo sigui nan estudio na EPI y esaki ta parti di nan curiculo cu nan tin cu completa aki na EPB.
Pa e motibo aki ta haci un apelacion na bo compania pa si tin e posibilidad di cupo di stage disponibel pa e alumnonan di EPB San Nicolas, pa nan por practica locual nan a siña na scol pa e alumnonan di 4e klas den e periodo di 22 di november 2021 te cu 17 di december 2021.
Naturalmente no tin gasto mara na pone cupo di stage disponible pa e alumnonan di EPB San Nicolas, den sentido cu e compania no ta obliga pa duna e stagiaire un recompensa financiero. Locual si EPB San Nicolas ta pidi pa tin un persona encarga cu e stagiaire (stagebegeleider).
Mas informacion tocante esaki ta sigui den caso cu bo empresa of compania acepta di otorga EPB San Nicolas un of mas cupo pa stage.
