ORANJESTAD (AAN): Siman a habri y e Minister responsabel pa transporte, Sr. Ursell Arends, a tene un encuentro cu empleadonan di Directie Luchtvaart Aruba.
Proposito di e encuentro aki ta pa informa empleadonan tocante e decision di Gobierno pa converti Directie Luchtvaart den un organizacion financieramente autonomo, pa duna informacion tocante e proceso cu lo worde sigui, y pa contesta preguntanan.
Durante e “kick-off meeting” aki, Minister Arends a elabora riba e motibonan cu a yega na e decision aki, cu a worde tuma na 2019 caba, pero nunca a worde implementa.
Motibo principal ta pa fortifica Directie Luchtvaart como organizacion, pa asina e por cumpli na un miho manera y na un manera mas duradero cu tur su tareanan, responsabilidadnan y tambe cu e rekisitonan di Organizacion Internacional di Aviacion Civil (ICAO) como tambe otro organizacionnan manera FAA.
E proceso di transicion lo worde guia door di un stuurgroep nombra pa Minister, cu entre otro representante di Ministerio di Transporte, Directie Luchtvaart, DWJZ, Directie Financieen, DRH, y sindicato. E stuurgroep aki lo institui diferente werkgroep y lo tin como prome tarea pa entrega un “stappenplan” pa minister dentro di 4 siman.
Minister Arends a enfatisa cu lo asegura un proceso transparente, unda lo duna e coleganan di Directie Luchtvaart un update cada luna.
Cu e proyecto aki lo fortifica Directie Luchtvaart, cu ta e stakeholder principal di aviacion na Aruba, responsabel pa e maneho y supervision di henter e ecosistema di aviacion na Aruba, cu ta di suma importancia pa nos turismo y nos economia.
