Ministro Rocco Tjon a otorga certificado di supervisor di Codigo di Proteccion

ORANJESTAD (AAN): Diaranson mainta, den un ambiente positivo, Minister di Husticia y Asuntonan Social Sr. Rocco Tjon

a haci entrega di certificado di supervisor di Codigo di Proteccion, na e profesionalnan cu a termina e curso.

   E proyecto aki, manera ta conoci, a nace algun aña atras pa medio di e “Social Crisis Plan”, cual a keda prolonga mirando e importancia cu e metodo aki tin pa e siguridad di nos muchanan.

   E proyecto aki lo continua bao di e capa di “Family Justice Center”, y hunto cu otro metodonan cu a worde introduci caba, manera “Signs of Safety”, cual tambe ta di balor agrega, lo worde treci mas cerca di otro pa di e forma aki por sigui contribui y traha mas eficiente y eficaz den e lucha contra abuso di mucha.

   Codigo di Proteccion ta consisti di cinco paso concreto cu e profesional ta tuma pa por garantisa e siguridad di e mucha. E ta un metodo di trabao, unda e profesional ta sigui e pasonan, ta pone e informacion di e situacion riba papel, ta papia cu coleganan y esnan alrededor di dje, y si ta necesario, ta pasa e informacion pa e instancia concerni pa por sigui atende cu e caso.

   Segun e mandatario, e ta di suma importancia pa, na momento cu ta trata casonan di abuso di mucha y en particularmente casonan di abuso sexual, percura pa trece un caso solido padilanti. Pa e motibo aki ta inverti hopi den e parti di educacion, training y workshops den e cauter sectornan esta; social, husticia, salubridad y enseñansa. Asina, e profesionalnan den e sectornan aki lo tin un miho conocemento pa loke ta atende cu informacion, pero tambe e situacion y e victimanan, pa asina crea casonan mas solido.

   Por ultimo, Sr. Tjon a agrega cu pa loke ta trata e pasonan legislativo cu ta worde tuma, por menciona cu varios paso a worde tuma caba, entre otro e aumento di castigo. Pues, di parti di Ministerio di Husticia y Asuntonan Social, ta sumamento contento cu e proyecto aki, y a felicita e 12 trainernan local cu a percura pa e 31 cursistanan por a logra termina e curso aki.

   Den e grupo di e 31 cursistanan cu a logra termina e curso, por mira cu tin profesional di tur cuater sector cu a worde menciona. Di e forma aki ta bay percura pa sigui mehora, contribui y combati abuso di mucha, particularmente abuso sexual.