Ministro Plenipotenciario Thijsen invitado special na Zomercarnaval di Rotterdam

ORANJESTAD (AAN): Informe di Hulanda ta indica cu Minister  Plenipotenciario mr. Ady Thijsen y esposa Yshel Thijsen-Rasmijn a presencia den stadhuis un recepcion na ocacion di e Zomercarnaval di Rotterdam.

   Den e Burgerzaal di e stadhuis e invitadonan a worde ricibi pa burgemeester suplente Tim Versnel. Sr. Versnel den su discurso a bisa cu e evento di Zomercarnaval na Rotterdam a bira asina grandi cu e ta sobrepasa e ciudad di Rotterdam y cu for di tur skina di Hulanda ta bin bishitante pa mira y goza di e Zomercarnaval. Tambe sr. Versnel a bolde remarca cu Zomercarnaval di Rotterdam ta riba e lista di herencianan cultural di Unesco. Tambe e burgemeester suplente a bisa cu pa prome biaha e aña aki tin un grupo di carnaval di Gemeente Rotterdam den e parada y asina mustra e compromiso cu Rotterdam tin cu e evento aki.

   E edicion aki di e Zomercarnaval tambe ta marca un punto final di presidencia di Karel Willem pa cu Stichting Zomercarnaval. Willems pa 40 aña tabata envolvi cu e organizacion di e Zomercarnaval di Rotterdam. Na October benidero lo tuma lugar e despedida oficial di Karel Willems como presidente di Stichting Zomercarnaval.

   Despues di e parti oficial e invitadonan a worde invita pa bay para dilanti stadhuis pa complementa y disfruta di e parada cu e aña aki a conta cu participacion di 40 grupo. Un zomercarnaval 2023 unda Aruba a sobresali, pa e motibo cu e Reina di Zomercarnaval 2023 ta e Arubiana Sharicia Hasham y e King di Zomercarnaval ta e Arubiano Orwin Gomes. Nan dos como Arubiano orguyoso tabata tin e honor di habri e parada. Tambe den e parada nos por a mira e conocido cantante di Calypso y Roadmarch di Aruba Claudius Philips.

  E zomercarnaval a cuminsa na 1982 na Utrecht. Despues di dos aña e evento a move pa Rotterdam y desde e tempo ey e crece bira un di e eventonan den aire liber mas grandi di Rotterdam. E potretnan ta cortesia di Arubahuis.