Cifranan di aña 2023...
ORANJESTAD (AAN): Siman a habri y Minister di Turismo y Salud Publico, sr. Dangui Oduber, a ricibi bishita di director di Organo Ehecutivo di AZV, ir. Edwin Jacobs, kende a entrega e cuenta anual di 2023 di e fondo di AZV, cumpliendo asina na tempo cu loke ley ta establece.
Resultado: E resultado di 2023 ta mustra e empeñonan haci di un banda pa gobierno pa percura pa suficiente entrada pa e fondo y di otro banda e desempeño di Organo Ehecutivo di AZV pa percura pa uzo debido di e medionan di e fondo. Sr. Jacobs den e encuentro a indica cu e entradanan di fondo di AZV a sobrepasa cu 54,1 miyon Florin e gastonan den 2023.
A consecuencia, sin duda, di e crecemento impresionante di nos turismo, e fondo di AZV su entradanan na prima y na BAZV a conoce un aumento di 22,3 respectivamente 36,8 miyon Florin. Mester remarca cu e introduccion di BAZV na frontera tambe a duna un bon contribucion na e extra entradanan pa e fondo.
Gastonan total: Pa loke ta trata gastonan, director di AZV a splica cu e gastonan a totalisa 474,3 miyon Florin. E gastonan a keda bou e plafond di 475,5 miyon cu Minister a indica cu no tabata permiti pa sobrepasa den 2023. Den e espacio aki, e fondo di AZV a logra absorba e eliminacion di e recorte di 5,5% riba tarifanan, budgetnan y lumpsum na un suma total di 14,5 miyon Florin.
Inversionnan: Ademas AZV a logra financia cierto inversionnan importante den cuido cu a keda posponi pa motibo di e pandemia y na mes momento a cuminsa cu ehecucion di e zorgakkoord (acuerdo di cuido), impulsa pa Ministerio di Salud na 2023.
E inversion adicional aki di 13,5 miyon Florin a keda reparti di e siguiente forma:
(*) Hospital 5,1 miyon.
(*) ImSan 4,1 miyon.
(*) Stichting BOB 1,8 miyon.
(*) Respaldo 1,0 miyon.
(*) y 1,4 miyon den estudio pa e pohnan, plataforma di estudio pa dokternan di cas, desaroyo di Aruba Health app y desaroyo di e cuadro financiero multi anual.
E surplus realisa durante 2023, conforme e reglanan di gobernansa di Cuadro Financiero Multi Anual, ta pasa forma parti di e reserva di e fondo di AZV, destina pa absorba deficitnan den e fondo premira pa futuro.
Satisfaccion: Minister Oduber a expresa su satisfaccion pa e recuperacion rapido di e fondo despues di e pandemia y e fortificacion cu ta tumando luga. Minister Oduber a expresa e compromiso di gobierno pa sigui percura pa e entradanan necesario pa e fondo y ta gradici OE AZV y su team pa e forma diligente di maneha e gastonan. Dos elemento importante cu mester contribui na e sostenibilidad financiero di e seguro medico, garantisando acceso na cuido di calidad pa nos hendenan awe y den futuro.
