Zoey Conijn di Luna Foundation:
“Nos tin hopi maltrato na Aruba”
ORANJESTAD (AAN) — Den entrevista cu DIARIO, señora Zoey Conijn-Berkel, di Luna Foundation, a mustra su indignacion cu locual a sosode cu e cacho Khaleesi, cu ta algo cu nunca el a wak den e nuebe añanan cu e ta den rescate.
Pero e no ta haci diferencia cu e otro casonan. “Nos tin hopi maltrato na Aruba”, el a expresa y a sigui bisa cu e doño di e cacho tin hopi hende rond di dje cu a wak ki ta pasando, y e ta puntra su mes di con nan no a reacciona? E ta pensa cu nan tambe ta fout. Di con nan no a yuda e mascota? Of di con no a haya Luna Foundation? No warda te e baca ta hoga pa yama nan.
Zoey a bisa cu e doño di e cacho ta un hende famoso cu semper tin hende na su cas. Un persona cu tur hende conoc’e. Di con nan no a bati alarma y busca ayudo? E mester a yega asina leu?
“Esey mi no ta compronde. Tur hende ta rabia cu ne awo, manera mi ta wak riba facebook. E agresividad cu ta andando awo, no ta bon. Di con e energia cu hende ta hincando den dje awo nan mester a hinke den dje semper, no wanta y aki dos siman nos ta lubida”, Zoey a expresa.
El a agrega cu no ta e persona aki, pero si tur hende lo a paga tino manera bisiña, famia, etc., e asunto aki no a yega asina leu.
Zoey a combersa cu e doño di e cacho, kende a bis’e cu el a laga e cacho den man di otro hende, pasobra e ta traha hopi y no a ripara ki ta pasando cu e cacho. Pero e ta su fout pasobra ta na su cas. Zoey tin 11 cacho y su yiu ta cuida nan. “Pero ami, como doño di cas tin cu wak pa mi mascotanan. Y bo sa cu si e ta mara bo tin cu bay wak kico ta pasando. No por ta cu bo cacho a haya babies y bo no sa. Con bo sa cu el a haya cuminda y awa? Y e cacho a yora, un bisiña a manda un grabacion, bo ta scucha cu e cacho tabata yora. Di con ningun hende a haci algo?” e dama a señala.
Zoey a indica cu e doño di e cacho ta bisa cu e tin depresion, y ken sa kico ta pasando den su cabes, ki ta su storia, “pero cu e ta fout e ta fout!” el a expresa.
