Ministro Mervin Wyatt Ras a bishita Mary Joan Foundation

ORANJESTAD (AAN):  Recientemente Minister Wyatt-Ras a bishita Mary Joan Foundation. 

Esaki ta un fundacion cu ta dedica su trabou na brinda apoyo psicosocial na pashent cu ta biba cu un diagnostico di cancer na pecho.

  Durante e bishita, e minister a haya oportunidad pa siña mas tocante e trabou valioso cu e fundacion ta haci pa brinda sosten y ayudo na pashentnan di cancer y tambe nan famia.

   Un di e parti nan mas impresionante tabata e tayer, caminda tin produccion di peluca. Esaki ta wordo traha di cabey natural cu ta ricibi via donacion. E peluca ta wordo traha na midi di pashent, tambe na man, cu hopi pasenshi y amor. Un bunita gesto pa duna un boost di confiansa y amor propio na esnan cu ta pasando door di e trayecto dificil aki.

   Minister tambe a combersa cu Nanda Braemer, un fysiotherapeut specialisa den terapianan pa adulto mayor, cu a comparti su propio trayecto personal y a conta di diferente producto y servicio cu Mary Joan Foundation ta brinda. Entre otro e productora ta yuda e persona cu ta lidia cu cancer na pecho pa sinti nan mes mas comodo y pa recupera seguridad y confiansa den su propio curpa.

   Durante e bishita, director Juan Tromp y president di board tabata presente, reforzando e compromiso di e fundacion pa sigui ofrece apoyo integral na comunidad.

   Mary Joan Foundation a sa di crea un espacio sigur y yen di empatia, cu hopi sosten y ayudo di voluntarionan y colaboracion di comunidad.  Masha danki Mary Joan Foundation pa e entrega sin fin y pa e compromiso pa sigui traha hunto pa un Aruba mas saludabel y solidario. Hunto nos ta mas fuerte.