Ministro impresiona cu desaroyo di e alumnonan di Muchila Creativo

ORANJESTAD (AAN): Diabierna ultimo a tuma luga na Enseñanza pa Empleo entrega di certificado pa alumnonan di Muchila Creativo cu a finalisa nan prome curso di e seccion di horeca exitosamente.

E clientenan di Muchila Creativo a siña etiquette y protocol di mesa, siña sirbi, traha cuminda y cocktail sin alcohol. Dos alumno a haci un demostracion di nan habilidad y a prepara un dushi cocktail cu nan a yama Muchila sin alcohol pa e mandatario.

   “E ta un honor y mi contento pa por ta presente awemainta pa un ocasion asina special, un grupo di alumno a haci un test, a pasa esaki exitosamente y awor lo ricibi nan certificado di capacitacion dirigi riba formacion di cuminda y bebida”. Ta hopi bunita pa wak cu nos hobennan special door di e Fundacion Muchila Creativo a haya e oportunidad aki via Enseñanza pa Empleo”, Minister Croes a enfatisa.

   E mandatario a agrega cu pa Gabinete Wever - Croes 1 y 2 inclusion ta hopi importante, pa inclui tur hende sin laga ningun hende atras, tur hende tin e mesun oportunidad, Aruba ta di nos tur. Ta gradici Enseñanza pa Empleo pa brinda nos muchanan special e oportunidad aki, sigur na dirigentenan cu ta haci esaki cu hopi dedicacion.

   E maneho cu Ministerio di Enseñanza, lo aplica como compas den e proximo 4 añanan ta e “Sustainable Development Goal” number 4; calidad di enseñanza esaki lo dirigi nos maneho pa yega na solucionnan y mehoramento den enseñanza di nos pais. Enseñanza ta un di e motornan di mas poderoso cu ta comproba cu ta garantisa desaroyo y sostenibilidad. 

   “Nos kier a felicita nos muchanan special cu e bunita logro aki, tambe nos ta hopi orguyoso di boso. Boso por conta semper cu sosten y apoyo di Gabinete Wever-Croes.

   Hopi exito y sigui siña pa den futuro haya un trabao den nos comunidad”, Minister Endy Croes a culmina su felicitacion.