ORANJESTAD (AAN): Recientemente e planta di WEB Aruba NV a ricibi bishita di Ministro Hulandes di Clima y Medio Ambiente, esta Rob Jetten.
Na WEB, e Minister y su delegacion a ricibi un presentacion di director Alfredo Koolman, riba WEB su vision y mision, inversionnan pa expansion di nos capacidad di energia sostenible, kico WEB a haci pa aumenta eficiencia di produccion, proyectonan manera Aruba Renewable Energy Strategy (ARES), Intelligent Generation Management System (IGMS), RECIP IV, y e ‘Upgrade Water Distribution Network.’ Tambe a trata e retonan di WEB pa cu tanto inversionnan den e siguiente añanan y cu WEB ta aplaudi e cooperacion anuncia den cuadro di e Conferencia CCEC 2023 pa cual WEB ta interesa den sosten pa cu su retonan.
Ademas di un presentacion, a tuma luga un tour na unda cu e Minister a cera conoci cu WEB su planta di awa y produccion di energia, incluydendo un bista di cerca di e proyecto di RECIP IV, Controlekamer, Flywheel, Sea Water Reverse Osmosis (SWRO) y na final, e laboratorium nobo di WEB na unda e Minister a dialoga cu coleganan di Lab tocante WEB su calidad di awa, sistemanan, certificacion y acreditacion ISO.
