Ministro Herde ta enfatisa pa balansa entre desaroyo y proteccion di Aruba su naturalesa

ORANJESTAD (AAN): Diaranson mainta simbolicamente ariba Dia Internacional di Mama Tera, Gobierno di Aruba a firma un Memorandum of Understanding (MoU) cu Fundacion Parke Nacional Aruba,

operando como Aruba Conservation Foundation (AFC) cu e meta pa fortalece e maneho sostenibel di area natural y marino na Aruba.

   E acuerdo aki ta marca un paso importante den e colaboracion entre gobierno y ACF, cu ya tin un rol clave den supervision y maneho di diferente area natural, incluyendo Spaans Lagoen y varios reserva natural marino riba e isla.

   E ubicacion strategico di e tereno, situa banda di awa y cerca di area natural protegi, ta haci esaki ideal pa un operacion eficiente di e tareanan cu ACF tin asigna. E centro proyecta lo contribui na fortalecemento di capacidad pa proteccion di naturalesa, control ambiental y educacion di comunidad.

   Minister di Infrastructura drs. Rene Herde a indica cu Aruba, manera hopi otro pais, ta enfrenta un demanda creciente pa desaroyo fisico, incluyendo construccion di vivienda y mehoracion di infrastructura. Sin embargo, mester subraya cu e progreso aki no por tuma luga sin considera e estado di naturalesa.

   "Sin un ambiente saludabel, e infrastructura cu nos ta construi lo no sostene a largo plaso," Minister Herde a remarca.

   Gobierno ta pone enfoke riba e necesidad di inverti den conservacion, educacion y investigacion pa logra restaura y mantene un ecosistema balansa.

Den e contexto aki ta importante pa corda iniciativanan manera momento cu Minister President Mike Eman a planta 100.000 palo, alavez ta crucial pa sostene Minister di Turismo Wendrick Cicilia su iniciativa pa introduci un dia di descanso pa lama. 

   Minister Herde a enfatiza cu e proteccion di naturalesa no solamente ta un obligacion ambiental, sino tambe un necesidad fundamental pa e bienestar economico y social di Aruba.

   Gobierno di Aruba ta reafirma su compromiso cu desaroyo sostenibel y proteccion di e medio ambiente na nos isla.