ORANJESTAD (AAN): Dialuna mainta durante conferencia di prensa di gobierno,
Minister Glenbert Croes a contesta prensa riba e pregunta relaciona cu e desacuerdo cu tin entre e companianan estatal y sindicato VWI.
Minister Croes a indica di no tin interes pa discuti of argumenta cu sindicato VWI den medionan di comunicacion, y a pidi e empresanan estatal cu ta Utilities, WEB y Elmar pa atende cu e solicitudnan di sindicato VWI y otro sindicatonan. Esaki pa trece mas claridad riba e proceso di destaho publico pa cu ehecucion di expansion di parke di molina di biento.
Minister Croes tambe a expresa cu loke ta importante pa su persona ta cu gobierno ta canando segun e plan di gobernacion y e plan energetico cu Gabinete Wever-Croes 2 ta kere den dje. Den cuadro di esaki, expansion di e parke di molina di biento ta fundamental. A traves di un destaho publico lo percura pa haya e miho candidato pa e proyecto aki. Mas importante, ta pa logra haya un mihor prijs pa produccion di electricidad cual lo beneficia no solamente e companianan estatal cu ta WEB y ELMAR pero comunidad en general.
“Mi no por compronde con un proyecto cu ta den interes di WEB, ELMAR, nos pueblo y nos economia, cu por tin hende cu ta contra. E proyecto aki ta conforme e plan nacional energetico di nos pais. Mi determinacion como Minister di Energia ta pa pone accion tras di e vision cu a worde poni den e plan aki y cu a worde acorda na nivel nacional na momento cu nos Minister President Evelyn Wever-Croes tabata Minister di Energia”, e mandatario a expresa.
Pa evita e discusionnan aki continua den medionan di comunicacion cu nos profesionalnan, Minister Glenbert Croes a pidi pa tanto empresanan estatal como e sindicatonan sinta dialoga cu otro y yega na un solucion den e mihor interes di pais Aruba.
