Ministro Glenbert Croes a duna gremionan un update encuanto e situacion di awa y coriente

ORANJESTAD (AAN): Recientemente, mescos cu a reuni cu Gremionan Sindical,

e mandatario a reuni cu Gremionan comercial kendenan tambe a vocifera nan preocupacion riba e ahuste di tarifa di awa y coriente.

   Den un reunion habri, Directornan di WEB Aruba NV, NV Elmar, y Utilities Aruba a duna un presentacion transparente di e situacion actual referente e ahuste temporario.

  Situacion di aumento di awa y coriente ta algo hopi fastioso y ta un anuncio cual ningun hende kier haci, sinembargo mientras cu mester a haci e anuncio y introduci e cambio aki, ya caba e mandatario ta premirando cu e desaroyo di mercado ta indica cu e aumento aki lo ta temporal. Minister Croes ta splica cu ta premira cu e prijs di awa y coriente  pronto lo baha back.

   Manera ta conoci WEB Aruba NV y NV Elmar a absorba e aumento di tarifa di fuel oil cu a bin ta tuma luga ya pa 7 luna caba. Gobierno di Aruba pa 7 luna largo a haci todo por todo pa evita un aumento di tarifa. Pero recientemente e situacion a yega na un punto caminda e companianan a yega na nan limite di locual cu nan por absorba. Asina mes Gobierno di Aruba a percura pa mientras cu e ahuste ta vigente, pa e reparticion ta mas social posibel teniendo na cuenta e situacion financiero, social y economico di nos pueblo.

   Na mes momento ta reconoce e importancia pa percura pa tin un balansa, teniendo na consideracion e consecuencia economico y costo di bida halto cu un aumento ta ocasiona.

Den cuadro di esaki mester menciona cu Minister Croes a keda hopi contento cu e anuncio di Minister Geoffrey Wever. ‘E siman aki colega Minister Geoffrey Wever a anuncia reduccion substancial den prijs di gasolin y diesel, cual mi ta hopi contento cu ne. E anuncio aki ta bin como Alivio. Y mi ta premira e momento cu lo yega cu awa y coriente tambe lo baha back.’

  E mandatario ta reconoce e hecho cu industria, comercio y hotelnan, como clientenan grandi ta aportando pa por tin un tarifa social pa esnan cu mas mester di dje y Aruba ta agradecido pa nan apoyo, e mandatario a termina bisando.