ORANJESTAD (AAN): Den cuadro di e luna di conscientisacion di Cancer di pecho cu ta wordo conmemora mundialmente durante luna di october,
Minister Gerlien Croes ta duna su apoyo total na e iniciativa nacional “Make Aruba Pink”. E campaña aki ta busca pa eleva conscientisacion den nos comunidad tocante e importancia di prevencion, deteccion na tempo, y e muestra di solidaridad cu esnan cu ta bataya contra e malesa aki y nan famianan. Como parti di e iniciativa, ministerio ta participa hunto cu Stadion Guillermo Prospero Trinidad den haci Aruba ros.
Ministerio ta haci un yamada na tur cabesante di scol, docente, personal administrativo, studiante y cas di famia pa uni na e movemento aki door di bisti na ros, organiza actividadnan educativo y reflexiona riba e tema aki durante e luna aki.
"Educacion ta e herment mas poderoso pa trece cambio y conscientisacion den nos sociedad. Ora nos ta educa nos hobennan y nos comunidad riba e importancia di cuida salud y detecta malesa na tempo, nos ta salba bida. Mi ta invita tur nos scolnan y instancianan educativo pa bisti ros y demostra cu Aruba ta uni den solidaridad cu e sobrevivientenan, e pacientnan y e famianan cu ta pasa den e proceso aki," Minister di Educacion a declara.
E campaña "Make Aruba Pink" ta recorda e comunidad cu deteccion trempan ta haci un gran diferencia. Promove e combersacion aki den ambiente escolar y familiar ta yuda kibra tabu y encurasha un estilo di bida consciente y saludabel for di un edad trempan.
Minister Gerlien Croes ta expresa su mas profundo gratitud y reconocemento na tur e fundacionnan, profesionalnan di salud, y boluntarionan cu ta traha incansabelmente pa hiba e mensahe di conscientisacion den tur skina di Aruba.
