Diasabra awor
ORANJETSAD (AAN): Ministerio di Finansa, Asunto Economico y Sector Primario, mr. Geoffrey Wever, ta invita pueblo di Aruba pa bishita e mercado di Santa Rosa cu lo tuma lugar atrobe Diasabra awor, Maart 7.
E sector primario ta uno masha importante, y ta un sector di enfoke pa e ministerio di Minister Wever. Ta reuni frecuentemente cu varios stakeholder den e sector, y a wordo indica cu tin un deseo pa e Mercado di Santa Rosa tuma lugar cu mas frecuencia. Mirando e importancia y impacto positivo di e sector primario y e popularidad di e Mercado di Santa Rosa, nos a tuma stapnan concreto pa wak esaki bira realidad.
Awor nos ta contento pa anuncia cu e Mercado di Santa Rosa lo tuma lugar semanal, enbes di mensual. Pueblo por disfruta di cumpra varios producto fresco y local, aportando na e economia local di Aruba, y tambe na e cunukero y agricultornan di nos isla. E mercado aki lo tuma lugar 3 siman na Santa Rosa y un siman na Plaza Lolita den e centro di San Nicolas como parti di e Pop-up Market.
Ta importante tambe pa comparti cu si bo persona kier participa cu bende producto local (fresco) na e mercado di Santa Rosa, registra na tempo ya cu espacio ta limita.
Minister mr. Geoffrey Wever ta felicita Santa Rosa pa e bon trabao cu nan ta eherciendo y pa e apoyo cu nan ta duna na e sector primario. Sector primario ta forma un parti di nos cultura di Aruba, y nos ta invita pueblo henter pa bishita e Mercado di Santa Rosa y forma parti di crea un impacto positivo den nos economia y nos comunidad.
