Ministro Geoffrey Wever convenci cu 47 camara na puntonan strategico na Playa lo yuda hopi

ORANJETSAD (AAN): Diamars mainta, Ministro Geoffrey Wever tambe tabata presente na e conferencia di prensa extraordinario di Gobierno.

   El a splica cu como parti di plan di Revitalisacion di Oranjestad, su Ministerio a co-finansia e proyecto di camara di seguridad pa nos centro di ciudad. Awe mainta durante un conferencia di prensa teni pa Minister Tjon, a haci anuncio di Fase 4 di e proyecto di camara di seguridad. Esaki ta un proyecto interministerial cu lo provee mas camara na luganan strategico cu lo contribui na seguridad di bishitante y tur cu ta biba of haci negoshi den nos centro di ciudad.

   Un inversion cuantioso di parti di Gobierno di Aruba pa seguridad den nos centro di ciudad.

   E factor di seguridad, pa e negoshi y pa e bishitantenan ta un preocupacion continuo. Pa es motibo, proyecto nan manera esaki ta esencial pa por yega na Revitalisacion di nos Centro di Ciudad. Inversionnan priva y publico ta sumamente necesario pa haci esaki realidad.

Den e ultimo lunanan por wak varios proyectonan publico y priva anuncia y tambe den ehecucion. Cu mas camara aloca strategicamente, lo contribui grandemente na e seguridad di e bishitantenan, como tambe mas proteccion di inversionnan den nos centro di ciudad.

   Segun Wever, nan ta agradecido na minister Rocco Tjon kende a mira e importancia di seguridad di nos centro di ciudad y tuma e iniciativa pa haci e proyecto aki posibel, y tambe agradecido pa e bon cooperacion interministerial na bienestar general. Ta hopi importante pa nos conhuntamente sigui inverti den e seguridad, limpiesa, y estetica di nos centro di ciudad. Esakinan ta condicionnan necesario pa un centro di ciudad revitalisa.