Ministro Geoffrey Wever a reafirma compromiso pa fortalece Sector Primario

Celebrando e di 50 aña di Santa Rosa

ORANJESTAD (AAN):  Minister di Finansa, Economia y Sector Primario, mr. Geoffrey Wever, a participa na e celebracion y a felicita Santa Rosa pa su trayectoria y contribucion na desaroyo di nos Sector Primario.
   Den un ambiente festivo, yen di tradicion, producto local y aprecio pa nos Sector Primario, Departamento di Agricultura, Cria y Pesca, Santa Rosa, a celebra su aniversario di 50 aña cu un Open Dag special. E celebracion a reuni cunukeronan, criadonan, piscadonan, productornan, comerciante y bishitantenan cu hunto a conmemora cinco decada di servicio na comunidad Arubiano.

   Durante e Open Dag, publico a haya oportunidad pa conoce y aprecia e diversidad di productonan local, encontra e personanan tras di nos produccion y celebra e tradicionnan cu ta forma parti di nos identidad Arubiano. E participacion di diferente vendors y productornan local a demonstra e dedicacion y potencial cu ta existi den nos sector primario.

   Un momento special durante e celebracion tabata e entrega di reconocimentonan, dedica na personanan y organizacionnan cu durante añanan a contribui na e departamento y na fortalecemento di nos Sector Primario.

   Entre e reconocidonan tabata WEB Aruba representa pa Sr. Robert Croes.  Señora Rachelle Peterson, Sr. Francisco Franken, Sr. Anthony Bello, Sr. Benjamin Romero, Sr. Franklin van der Linde y Sr. Arthur Giel, kende nan contribucion y cooperacion ta representa e importancia di compromiso, participacion y sosten na nos agricultura, cria y pesca.

   Minister Wever a extende un felicitacion y agradecimento special na señora Nathalie Maduro, directora di Santa Rosa durante e ultimo 16 aña, pa su dedicacion y compromiso cu e departamento. E mandatario a reconoce tambe e trabao di henter e team di Santa Rosa, tanto personal actual como esnan cu durante e añanan a forma parti di su historia.
   Durante e discurso di Minister Wever, Minister Wever a recorda cu diputado defunto señor Daniel Leo cu tabata tin e vision pa bin cu un departamento manera Santa Rosa y cu awe nos por celebra 50 aña di Santa Rosa ta danki na e vision aki.

   Un agradecimento special a bay tambe na tur cunukeronan, criadonan, piscadonan, productornan, vendors, organizacionnan y colaboradornan cu diariamente ta contribui na nos Sector Primario y cu a forma parti di e celebracion.

   Ademas di celebra e historia di Santa Rosa, e aniversario a brinda oportunidad pa destaca diferente desaroyonan cu ta den proceso pa fortalece e departamento y e Sector Primario.

   Minister Wever a indica cu Gobierno di Aruba a inicia un proceso pa cuater contrato di servicio pa mantencion, renobacion y mehoracion di diferente seccionnan di Santa Rosa. E meta ta pa fortalece capacidad di e departamento y mehora e servicionan cu e ta brinda na nos cunukeronan, criadonan y productornan local.

   “Ora nos inverti den Santa Rosa, nos ta inverti tambe den e productornan cu ta depende di su asistencia y den futuro di nos alimentacion local. Nos ta inverti den un sector crucial,” Minister Wever a expresa.

   Entre otro desaroyonan importante ta e introduccion di bestia nobo di cria na Aruba despues di 14 aña, cu e obhetivo di fortalece diversidad genetico y calidad di cria local. Esaki a ser logra mediante cooperacion entre Gobierno di Aruba, Santa Rosa y Comision Pro Cunukeronan Arubiano.

   Tambe e proyecto Cunucu Butucu a ricibi aprobacion di Conseho di Ministro pa sigui cu su desaroyo. E iniciativa aki ta enfoca riba crea condicionnan pa facilita produccion agricola y cria, incluyendo acceso na tereno y infrastructura apropia. Hunto cu e proyecto Agri-Innovation Park, e desaroyonan aki ta forma parti di e esfuerzo pa combina agricultura tradicional cu innovacion y oportunidadnan nobo.

   E mandatario a enfatisa cu pa fortalece produccion local y contribui na siguridad alimentario di Aruba, cooperacion y dialogo cu e personanan activo den e sector ta esencial. Nan experiencia y conocemento ta indispensable pa identifica retonan y desaroya solucionnan cu ta funciona den practica.

   Cu cinco decada di servicio, Santa Rosa a acompaña diferente generacionnan di cunukeronan, criadonan y piscadonan, brindando orientacion, asistencia y sosten na e sector. E aniversario aki ta un momento pa honra e trayectoria di e departamento, pero tambe pa reafirma e importancia di sigui inverti den su futuro.

   “E sector primario no ta solamente parti di nos pasado y nos tradicionnan. E ta forma parti di nos futuro, nos identidad, nos siguridad alimentario y nos desaroyo economico,” Minister Wever a enfatisa.

Minister Wever ta felicita Santa Rosa cu su aniversario di 50 aña y ta gradici tur esnan cu a contribui na e celebracion, asina tambe na e desaroyo di nos Sector Primario durante e ultimo cinco decada.