Ministro Endy Croes a divulga cu pa fin di e aña aki caba e renobacion di St. Aloysiusschool lo ta cla

ORANJESTAD (AAN): Dialuna mainta riba tereno di St. Aloysiusschool na Noord, a presenta oficialmente e proyecto di renobacion di St. Aloysius School.

   Presente na e ocasion special aki tabata Presidente di Parlamento sr. Edgard Vrolijk, miembronan di coalicion, Minister President señora Evelyn Wever- Croes, directora di SKOA, señora Anuesca Baly, architect di e proyecto sr. Rafi Kock, Pastoor Jairo Maduro di bestuur di SKOA y cabesante di St Aloysius School sr. Vladimir de Cuba, Directie Onderwijs, Inspectie Onderwijs, DUOS, prensa y demas invitado.

   E ceremonia a inicia cu un bunita palabranan, oracion y bendicion di Pastoor Jairo Maduro cu alavez ta di bestuur di SKOA. Directora di SKOA, sra Anuesca Baly a expresa cu awe ta un dia sumanete feliz pa SKOA; un di nan scolnan ta worde renoba. Un scol cu ta un patrimonio cultural, e ta un scol cu a forma no solamente un alumno pero miles di alumno. Señora Baly a sigui bisa cu renobacion di un scol ta parti di nos herencia, un parti di ken nos ta como Arubiano. ‘Awe mi ta sumamente feliz’ paso un di nos scolnan ta worde renoba y aki un par di luna nos por yama nos alumnonan di St. Aloysius bon bini back na cas. Señora Baly ta gradici Minister Endy Croes, Minister President Evelyn Wever- Croes como tambe e Parlamentarionan.

   Arkitecto Kock: Rafi Kock te architect encarga cu e tarea pa diseña e scol su renobacion. Sr. Kock a conta cu cinco aña pasa el a tende un frase hopi importante di Minister President cu a indica cu nos mester focus no solamente riba haci cosnan nobo pero reduci y re-uza loke nos tin. A haci uzo di e mes un palabranan ey pa drecha un scol cu hopi a pensa cu mester a worde benta abou. E ta un edificio cu un herencia, ta miho drecha cu bente abou.  E edificio lo haya un cara nobo, e scheur y dak lo worde drecha. Parti patras di e edificio lo kita e plachinan di asbest y lo pone un dak nobo y tambe un gymlokaal.

   Minister Endy Croes a expresa di ta sumamente contento y orguyoso di un momento hopi special pe pueblo di Aruba y pe districto di Noord. E mandatario a enfatisa den su discurso cu e logro aki ta basa riba dos palabra accion y determinacion. Minister Endy Croes den un discurso elocuente a conta e historia di scol den e districto di Noord como tambe di e nomber di e scol. E mandatario a indica cu e ta honor pero alavez un obligacion di por a contribui na e realisacion di e proyecto aki.

   Tin 2 miyon Florin disponibel pe proyecto di renobacion di cual lo bira uno hopi bunita y prome cu final di 2022 e alumnonan por ta back na nan scol di nan soño. E mandatario a termina felicitando Gabinete Wever - Croes 2 cu e logro aki y alavez ta felicita SKOA, cabesante, docentenan, alumnonan, mayornan y gradici tur stakeholders’ cu a contribui pa por realisa e proyecto aki.

   Prome Minister tambe a hiba palabra, y a expresa di ta hopi contento cu a logra e momento aki y ta gradici Minister Endy Croes, den e proceso di formacion nos tabata sa cuanto problema tin den enseñansa y nos tabata busca un persona por traha riba solucion y mi ta aprecia e forma y dedicacion con e mandatario ta busca solucion.

   E trabaonan di construccion pa cu e proyecto di renobacion di e hala noord, zuid, biblioteca y oficina. Si tur cos bay bon manera ta programa e alumnonan lo por ta back den nan scol prome cu fin di e aña aki.