Ministro Dowers cu delegacion di Reino presente na 1er dia Asamblea General di Nacionnan Uni

ORANJESTAD (AAN): Minister di Husticia, Integracion, Transporte Publico y Energia, mr. drs. Arthur Dowers,

hunto cu delegacion di Reino Hulandes, Diamars a atende e prome dia di Asamblea General di e di 81 Asamblea General di Nacionnan Uni na New York.

   E Debate General a cuminza Diamars 22 di september, na sede di Nacionnan Uni y ta trece hefenan di Estado y Gobierno, ministernan y otro representantenan di alto nivel for di diferente parti di mundo, hunto. E Asamblea General ta sigui te cu 26 di september y ta conclui dia 28 di september. 

   Minister Dowers ta participa na High-Level Week como parti di delegacion di Reino Hulandes. Presencia di Aruba den e delegacion ta brinda oportunidad pa nos pais ta representa den e dialogonan internacional y pa mantene contacto cu partnernan di Reino y internacional.

   Durante e siman, diferente tema di importancia internacional ta forma parti di e programa, entre otro desaroyo sostenibel, cambio climatico, salud, paz y siguridad. Pa Aruba, varios di e temanan aki tin relevancia directo, teniendo na cuenta nos posicion como isla chikito y e retonan particular cu esaki ta trece cu ne. E programa oficial di High-Level Week ta inclui, entre otro, reunionnan di alto nivel tocante accion climatico, derecho na desaroyo, subida di nivel di lama y preparacion contra pandemia. 

   Participacion di Minister Dowers durante High-Level Week ta forma parti di e compromiso pa Aruba sigui activamente involucra den dialogo y cooperacion internacional, y pa e realidad y interesnan di nos isla sigui haya atencion dentro di e contexto di Reino.