ORANJESTAD (AAN): Ministro di Turismo, Dangui Oduber tambe tabatey Dialuna mainta na e Conferencia di Prensa, hunto cu minister Tjon,
minister Arends y minister Wever, a firma e acuerdo interministerial entre 4 ministerio pa di 4 fase di e proyecto di camara di seguridad cu ta hopi importante pa nos localnan pero tambe nos turistanan.
E exito di nos turismo ta depende di diferente factornan. E ta depende di vision, maneho, inversionan den mercadeo, inversionan den producto Aruba y un factor hopi importante ta inversionan den seguridad.
Na momento cu turistanan ta usa search engines pa busca nan destinacion di vacacion un factor cu ta determinante ta seguridad. Aruba keto bay ta worde considera e pais mas sigur den henter e region di caribe y esaki ta un ventaha grandi cu nos tin y ta algo cu nos mester percura pa mantene.
Gobierno a cera un acuerdo cu nos compania estatal Setar pa provee, instala y mantene camaranan. Nos ta hopi contento cu cuatro ministerio por a uni y pone fondonan disponibel pa pone camara den henter area di Oranjestad.
Esaki lo trece mas seguridad pa nos localnan pero tambe especialmente nos turistanan crusero.
Nos kier a gradici minister Tjon pa ehecuta un otro bon proyecto pa Aruba, ministernan Wever y Arends pa pone fondonan disponibel y tambe Setar pa por bay ehecuta un proyecto hopi importante pa seguridad di nos isla.
Promer cu 2017 no tabata tin camara di seguridad. Tabata tin un proyecto di camara si cu nunca a mira luz di dia.
Awe Gabinete Wever-Croes 2 tin caba 250 camara instala.
