ORANJESTAD (AAN): Diamars mainta Minister di Turismo y Salud Publico a reuni cu Gevolmachtigde Minister na Washington DC,
señora Zulema Dabian. Durante e reunion, cu a bay den un esfera ameno, Minister Dangui Oduber, a enfatisa e importancia di Merca pa cu nos turismo y pues pa cu Aruba su economia. Minister a elabora ariba proyectonan actual y proyectonan di futuro cu ta planea pa aña 2024.
Temanan y proyectonan di importancia cu ta encamina hunto cu e vision di ministerio di turismo, esta diversificacion di nos turismo mericano, mantene y explora posibilidadnan pa cu “mayor airlines” y “cruise lines”. Pa cu esaki Minister tin planea pa ehecuta un roadshow durante aña 2024. Minister a elabora ariba e MOU cu Ministerio di Turismo a sera conhuntamente cu MinAz, Aruba Ports Authority y Jaxport. E plan ta pa cuminsa traha riba proyectonan specifico pa asina sera un letter of intent (LOI).
Minister a enfatisa e interes cu Aruba tin pa atrae inversionistanan pa cu parti di logistica y pa cu sector di cuido. A la bez Minister Dangui a sigui elabora su interes pa sigui traha hunto cu centro medi conan na Merca pa nos pashentnan cu mester trato specialisa y pa bin cu convenionan cu Universidadnan di Merca pa cu profesionalnan den sector di cuido. Un tema cu tin sumo importancia pa Aruba ta esun di US Customs and Boarder Protection (CBP) cu ta importante den cuadro di nos turimo, esaki ta pa e parti unda e turista mericano ta haci su “preclearance” na Aruba mes.
Minister Oduber ta sigur cu señora Zulema Dabian-Erasmus lo tin un balor agrega pa Aruba na Washington y ta desea a la bez señora Zulema Dabian-Erasmus hopi exito den su funcion como Gevolmachtigde Minister na Washington DC.
