Ministro Dangui Oduber a reuni cu JGZ riba maneho cu tin pa hobennan na Aruba

ORANJESTAD (AAN): E siman aki, Minister di Turismo y Salud Publico a tene un reunion cu Jeugdgezondheidszorg (JGZ) pa ta na altura di tur desaroyo cu tin.

Tambe e mandatario a comparti locual ta su vision y maneho pa cu JGZ y alaves a planea e proximo pasonan.

   JGZ ta un departamento di DVG cu ta traha hopi di cerca cu Wit Gele Kruis. Manera ta conoci Minister Oduber su maneho ta basa riba prevencion y pesey JGZ ta hopi importante paso prevencion ta cuminsa cu nos muchanan y hobennan.

JGZ ta enfoca na yuda nos muchanan y hobennan pa cu nan salud y bienestar di momento cu nan nace te na momento cu nan tin 25 aña di edad. Nan ta brinda ayudo den tur e periodo di e mucha su bida, tambe den su adolesencia te ora e ta un hoben adulto. Nan ta duna cuido preventivo y curativo riba tereno di problemanan psicosocial, riba tereno emocional y riba salud corporal.

Minister Oduber a indica cu JGZ su programa di scol saludabel ta uno conoci caba den nos comunidad caminda nan ta enfoca riba nutricion, salud fisico y educacion den mantene un bida saludabel na nos muchanan y hobennan. Den e esaki JGZ ta traha hopi di cerca cu Sociale zaken y Directive Onderwijs.

   Minister Oduber ta contento di e trabaonan preventivo cu JGZ ta haciendo, educando nos muchanan desde un edad jong pa ta mas saludabel. E mandatario ta sigui encurasha e comunidad di Aruba pa hiba un bida saludabel. Haci ehercicio ta e mihor medicina y prevencion den salud ta e solucion pa un miho sociedad.