ORANJESTAD (AAN): Recientemente Parlamentario Aquanette Gunn di Partido MAS a manda un serie di pregunta na Ministro di Labor, Glenbert Croes.
DIARIO a nota cu Diaranson 12 di Januari 2022, cu Ministro Croes a manda un contesta, y a agrega raport di Departamento di Labor y Investigacion (DAO) riba e cifranan di mercado laboral 2020 cu a ricibi 10 di Januari cu a pasa.
Encuanto e programa “Aruba Kier Traha”, segun Parlamentario Gunn, e por a tuma nota den e rueda di prensa cu Minister a elabora di un programa Aruba kier
Traha.
(Pregunta 19). Minister a informa cu lo ofrece un prome curso cual ta "Change of Mindset" pa prepara e hendenan completamente di nobo pa e mercado laboral, for di "soft skills" te cu nan conducta ora di haci solicitud di trabao y cu lo brinda asistencia pa traha un CV. Minister por informa Parlamento cuanto e costo di e prome curso aki lo ta?
Aki Ministro Glenbert a contesta cu e curso Mindset Reset a wordefacilita pa e infrastructura di Enseñanza pa Empleo. E curso a worde duna na 4 grupo cu a consisti di 6 sesion di 2 ora y ta worde cubri door di e presupuesto di Enseñanza pa Empleo.
(Pregunta 20). Minister por informa Parlamento si ta e personanan aki mes lo mester cubri e gasto aki? Si e contesta ta afirmativo, Minister por splica Parlamento na ki forma esaki lo sosode siendo cu nan ta desemplea?
Aki Ministro a contesta cu ‘Aruba Kier Traha’ conhuntamente cu Enseñanza pa Empleo a organiza Mindset Reset Gobierno no a exigi contribucion financiero pa cubri gasto di e curso, solamente nan presencia y participacion.
(Pregunta 21). Minister por informa Parlamento si e programa Aruba kier traha lo cay bao di un of e tres departamentonan subsidia caba door di gobierno, esta Enseñanza pa Empleo, Departamento di Labor y DAS?
Ministro a bisa cu ‘Aruba Kier Traha’ ta un programa cu ta resorta directamente bao di e ministerio di Labor, Energiay Integridad. E ta un palataforma di cooperacion entre departamentonan di Gobierno EPE, DPI, DAO, DAS y gremionan.
(Pregunta 22). Si e contesta ta afirmativo, ki rol cada departamento lo tin den e programa aki?
Ministro a bisa cu tur departamento ta un stakeholder den e plataforma di Aruba Kier Traha. Tur departamento ta keda cu su mesun rol y uitvoering. E Plataforma di AKT ta encarga pa mehora cooperacion y comunicacion entre tur stakeholders pa asina den un "realtime" e retonan riba mercado laboral por worde discuti y soluciona.
(Pregunta 23). Si e contesta ta negativo, na ki manera y for di unda lo saca e suma pa e proyecto di AKT aki keda ehecuta?
Ministro a contesta cu “Aruba Kier Traha” ta un stuurgroep pa medio di un Decreto Ministerial, por lo cual no lo worde cubri pa medio di subsidio. Lo traha cu otro instancianan gubernamentai (manera EpE pa her-, bij-, y omscholing) pa facilita e trabaonan. Tambe e team cu a traha den EASE taskforce lo bay over pa
Aruba Kier Traha y nan tur ta personal di Gobierno y di Bureau Minister.
(Pregunta 24). Minister por informa Parlamento si Enseñanza pa Empleo lo duna prioridad na esnan cu a nace na Aruba y/a tin nacionalidad hulandes pa e cuponan disponible di e curso aki?
Ministro a contesta cu na Enseñanza pa Empleo tur hende ta bon bini ora nan kier sigui un curso di recapacitacion pa asina traha riba un miho futuro pa nan
Mes y pa e isla. Den e programa di Aruba Kier Traha lo duna prioridad na esun cu a haya asistencia di EASE pa un tempo largo.
(Pregunta 25). Si e contesta ta afirmativo, Ministro por splica Parlamento ampliamente kico ta e plan di accion pa cu esnan cu tin un permiso di trabao temporal cu kier atende e curso aki?
Ministro a bisa cu e personanan cu tin un permiso di trabao temporal, ta mara na un dunado di trabao, cual ta significa cu e personanan aki tin trabao. Si a caso nan no tin trabao mas, e permiso ta vencey e persona aki lo tin e oportunidad di cambia di dunado di trabao semper y cuando tin necesidady demanda pa esaki riba e mercado laboral.
