Ministerio di Infrastructura a start proceso pa extension di ROPV actual

Tambe preparando pa un ROPV nobo

ORANJESTAD (AAN): Ministerio di Infrastructura a anuncia e inicio di preparacion di un decreto nobo pa extencion di ROPV actual y simultaneamente, preparacion di un ROPV revisa y nobo. E paso nan aki ta parti di e Plan di Infrastructura Nacional, manera menciona den e plan di gobernacion di AVP-Futuro y ta bin for di e necesidad pa maneha e transicion entre e ROPV actual y un ROPV nobo.

   Segun anuncio, e decreto di extencion lo prolonga e validez di e ROPV actual pa e periodo necesario pa prepara un version nobo riba un base realistico. Minister Herde a indica cu e proceso di renobacion lo tuma un tiki tempo y cu den e proceso lo involucra departamentonan y instancianan gubernamental, priva, organizacion no-gubernamental y partnernan importante di sector priva.

   E decreto lo indica formalmente cu un ROPV revisa y nobo ta den preparacion. E decreto aki lo por contene condicionnan y reglanan na cual mester atene na nan te ora cu e ROPV nobo ta cla pa implementacion. Tambe a wordo indica cu e preparacion di e decreto lo tin un duracion fiho pa un periodo concreto, cu ta sirbi pa duna siguransa cu un ROPV revisa y nobo lo bin despues di e proceso di preparacion y consulta.

  Ministerio di Infrastructura a subraya cu e proceso aki ta importante pa duna claridad riba e trayectoria di trabao y pa tene tur instancia y partnernan involucra na altura di e desaroyonan na caminda riba tereno di maneho di espacio y ordenansa na Aruba.