Minister Xiomara Maduro a cumpli 15 aña como politico

ORANJESTAD (AAN): Dia 7 di augustus Minister Xiomara Maduro a cumpli 15 aña cu ela debuta como politico na Pais Aruba.

E mandatario a debuta como politico na augustus  2009 y ta participa na eleccion di september 2009 y ta keda eligi como Parlamentario di Pais Aruba. Na september 2013 Xiomara ta wordo re-eligi como representante di pueblo y ta bolbe drenta Parlamento di Aruba.

            Xiomara ta fungi como Parlamentario pa ocho aña durante cual e tabata conoci pa e forma critico pero constructivo cu e tabata controla Gobierno, semper defendiendo e interes general. Un parlamentario cu curashi y determinacion.

            Na eleccion 2017 Xiomara ta figura como number 2 riba lista di e partido geel. Partido MEP ta gana eleccion y ta forma un Gobierno di coalicion y Xiomara ta asumi e responsabilidad como Minister di Finansa, Asuntonan Economico y Cultura pa Pais Aruba den e Prome Gabinete Wever-Croes.

            Na aña 2021 Xiomara ta participa na su di 4 eleccion. MEP ta bolbe gana eleccion y ta bek den Gobierno. Xiomara ta haya e confiansa pa un bes mas carga e responsabilidad como mandatario y ta haya e carteranan di Finansa y Cultura den e Gabinete Wever-Croes II.

Como Minister, ela hiba un maneho cu dedicacion, seriedad y transparencia. Den su trayectoria como Minister, Xiomara a haye cu varios reto:  debenan astronomico hereda, sigui pa un pandemia devastador y condicionnan impone pa Hulanda.

            Apesar di esakinan, ela continua y cu fe den Dios y trahando diligentemente cu su coleganan Minister, Departamentonan y su team, e ta logra pa pone finansa publico di Aruba bek riba pia,  haya reconocimiento di institutonan financiero local y internacional, y ta logra pa dos aña sigui pa Pais Aruba tin presupuestonan cu surplus.

            Un mandatario cu semper ta sostene y promove Aruba su Cultura, manera su lema ta bisa: Cultura, bo tin cu bib’e! 

            Xiomara ta un persona carismatico cu ta traha duro, cu seriedad y cu curason y caracter pa Pais Aruba.

            Su coleganan di Bureau a sorpresa e mandatario cu un celebracion chiquito na ocasion di su 15 aña como politico sirbiendo nos Pais. Durante e ocasion aki Minister Xiomara Maduro a gradici Movimiento Electoral di Pueblo pa e oportunidad pa por forma parti di e movecion politico. E mandatario a bisa ‘Mi ta gradici Dios pa e guia, sabiduria y forza y mi ta spera di por sigui conta cu su bendicion pa por cumpli cu e trabou na bienestar di Aruba’. Minister Xiomara tambe a gradici tur persona cu ta apoya su trabou como un politico di Pais Aruba y ta yama nan danki pa e respet y e apoyo.