ORANJESTAD (AAN) Minister di Salud Publico y Asuntonan Social, señora Mervin Wyatt-Ras, den entrevista cu Matutino DIARIO a señala,
cu e no por compronde e criticanan cu tin, pasobra durante hopi tempo tin adictonan riba caya.
“Pero awo ta un problema grandi mi ta kere, pasobra mi ta minister di tambe di Slavenzorg, cu tin un ministerio dirigi riba adiccion, kiermen cu esaki ta haci cu hendenan ta yega mas lihe pa duna nan keho, critica, conseho y nos ta tume tambe, pasobra mi ta kere cu nos mester zorg tambe pa nos hendenan cu ta den adiccion, por haya un yudanza”, e dignatario a splica.
Minister Wyatt-Ras a agrega cu aworaki e ta cay conhuntamente cu Salubridad y cu Asuntonan Social. Antes e tabata cay bao Husticia, despues bao Husticia y Social y aworaki tin e Ministerio di Salud conhuntamente cu esey.
“Kiermen, e adicto e ora ey tin un acercamento interdisciplinario. Esey ta haci tambe cu awo tin mas posibilidadnan. Nos tin hopi cliente cu ta aumentando, cu ‘double trouble’. Kiermen cu no solamente tin adiccion, pero tambe problemanan psico-social of di salud mental. Eseynan por bay na un otro instancia y esey ta e reto aworaki. Pues, personanan cu kizas no ta motiva ta bay busca un lugar, por ta nan ta riba caya pasobra nan ta haya droga facil. E ora ey nos tin e ‘Bemoeingzorg’ cu ta bay cerca e clientenan aki, duna nan cuminda y papia cu nan pa motiva nan pa bay un lugar unda nan por haya cuminda, por baña, p’asina motiva nan pa drenta den terapia, den un facilidad cu ta yuda nan cu nan adiccion. Esey nos ta purba cu esnan cu ta adicto”, e mandatario a comenta.
El a agrega cu pa otro casonan unda un hende a perde su hogar y no por haye, naturalmente por acudi pa ayudo. “Tin hende ta bin puntra si por yuda nan cu un cas ora cu nos ta bisa nan pa inscribi, nunca nan ta inscribi. Tambe nan mester cana e caminda y busca e yudanza. Nos tin cu bay wak con pa atende e tipo di casonan aki tambe. Tin personanan cu ta djis critica, nan ta cuestiona riba facebook diferente cos, pero ora di puntra nan si nan a bay cerca un instancia, nan no a papia cu ningun hende, instancianan no conoce nan, esey tambe nos tin cu educa nos pueblo cu no ta riba facebook, ni ta na radio of television, bo ta busca yudanza pero si bo tin cu bay e instancia of departamentonan cu ta atende nan tambe, y naturalmente nos mester tin bista riba nan tambe, pa wak con e ayudo ta bay”, Minister Wyatt-Ras a señala.
