Su Ministerio, hunto cu DAS y Husticia ta trahando pa un solucion
ORANJESTAD (AAN) Minister di Salud y Asunto Social, Mervin Wyatt-Ras, den entrevista cu Matutino DIARIO, a referi na e hecho cu e problemanan di salud mental a aumenta hopi den nos pais, y cu tin hopi adicto cu, ademas di nan adiccion tin problema di salud mental.
E dignatario a menciona cu tin un grupo di profesionalnan forma, no solamente di su Ministerio pero tambe di Husticia, y otro ministerionan, unda cu nan ta atende cu e problema a aki, y purba busca un solucion.
“Esaki tambe ta un problema cu a crece durante e añanan. Prome cu nos a drenta den gobernacion e problema tabata tey, pero no a wordo treci dilanti manera aworaki, cu e ta hayando hopi atencion, door di media, di comerciantenan, y nos meta como gobierno ta pa haci e ciudad di Oranjestad mas atractivo y otro ciudadnan, manera San Nicolas, tambe”, Minister Hyatt-Ras a acentua.
Tambe e comerciantenan kier tin nan lugar sin molester di adictonan, y e no ta nenga cu esey ta sosode. Prome tambe nan tabata tey pero e problema no tabata wordo mira como algo asina grandi manera awo, segun e mandatario.
“|Nos ta conciente di esey, y nos ta bezig den diferente plataforma, papiando p’asina wak con nos por yega na solucion, y mientras tanto nos por bisa cu e situacion ta andando y nos ta purba, con cooperacion di tanto Cuerpo Policial pero tambe cu otro instancianan, pa na momento cu tin casonan, nos por atende cu nan na un forma diligente y responsabel.
