Minister Wyatt-Ras a subraya cu Sociaal Vormingstraject ta un oportunidad importante pa hobennan desaroya nan mes

ORANJESTAD (AAN):  Tres hoben a culmina fase 2 di Sociaal Vormingstraject (SVT-19) cu exito y a ricibi nan certificado for di Minister di Asunto Social, sra. drs. Melvin Wyatt-Ras, hunto cu Minister-President sr. mr. Mike Eman.

Despues di a completa fase 1 na 2025, e cursistanan a sigui cu fase 2 di e programa, durante cual nan a haya experiencia riba tereno laboral na diferente compania y organisacion local. Durante e fase aki nan a pone den practica disciplina, responsabilidad y habilidadnan cu nan a desaroya durante nan formacion.

Sociaal Vormingstraject (SVT) ta un programa cu ta guia hoben entre 17 y 24 aña den nan desaroyo personal, social y profesional. E meta di e programa ta pa brinda hoben e oportunidad pa fortalece nan capacidadnan y prepara nan pa un futuro mas stabil y positivo.

Cursistanan cu a culmina fase 2 di SVT-19

• Alexander Dorotaal
  • Romano Maduro
  • Leonardo Gomez Reyes

Minister Wyatt-Ras a felicita e hobennan pa nan perseverancia y compromiso durante e programa.

“Boso a demostra cu disciplina, perseverancia y compromiso por habri porta pa oportunidad. Nos ta orguyoso di boso y di e paso importante cu boso a tuma pa construi un futuro positivo,” segun Minister Wyatt-Ras.

E Minister a expresa su gratitud tambe na tur persona y organisacion cu a contribui na guia e grupo durante nan formacion.

Contribuyentenan

• Coordinadora di Formacion Social, sra. Jessica Ras
  • Trahado Social di Formacion Social, sra. Nicole Godett
  • Sra. Shamilla Williams, cu a guia y forma e hobennan riba e.o. con pa presenta nan mes

Representantenan di Koninklijke Marine & Arumil: Commandant Tim van Wijk , Kapitein Ligtvoet, Sargeant Croes, Sargeant Leito, Sargeant Corvacho, Korporaal Thijsen, Korporaal Arendsz y Marinier Koolman.

Minister Wyatt-Ras a subraya cu Sociaal Vormingstraject ta sigui representa un oportunidad importante pa hoben desaroya nan mes, fortalece nan confiansa den nan capacidad y contribui positivamente na comunidad.