ORANJESTAD (AAN): Ministro di Finansa, Asunto Economico y Sector Primario di Aruba, mr. Geoffrey Wever,
lo representa Aruba na reunion di Conseho di Ministro di Caribbean Financial Action Taskforce (CFATF) cu ta tuma luga den e segundo parti di e siman aki na Ciudad di Panama. CFATF ta un organo regional di 25 miembro, cu ta coordina e esfuersonan di paisnan di Caribe pa fortalece nan sistema contra labamento di placa, financiamento di terrorismo y financiamento di proliferacion di armanan di destruccion masivo.
Como miembro di e Conseho di Ministro, Aruba lo uni cu otro representante na nivel ministerial pa aproba e direccion strategico y maneho di CFATF pa e periodo 2025–2028, incluyendo e plannan subsidiario den varios area operacional.
E reunion aki ta sirbi tambe como un plataforma pa gobernantenan reafirma nan compromiso politico cu CFATF su mandato y pa garantiza cu region ta bon prepara pa duna respuesta na e reto global den lucha contra crimen financiero. Na aña 2021 Aruba a pasa e evaluacion mutuo di CFATF den un forma hopi bon y e siguiente evaluacion lo tuma lugar na luna di maart di aña 2030.
Aruba pa medio di varios instancia local, manera Banco Central, Ministerio Publico y Unidad di Intelligencia Financiero di Aruba (FIU-Aruba) ta participa activamente na e actividadnan y reunionnan plenaria di CFATF.
Minister Wever a indica cu “Aruba ta compromete den lucha regional contra financiamento ilicito. Nos participacion na e nivel aki ta mustra nos dedicacion pa sigura cu CFATF ta keda fuerte, responsabel y alinea cu e standardnan internacional. Mi ta spera un discusion productivo y pa reafirma e sosten di Aruba pa nos strategia colectivo.”
