Publico mes awor por check investigacionnan di Universidad di Aruba
ORANJESTAD (AAN): Sin duda alguno ta di aplaudi cu awor Universidad di Aruba ta pone riba internet, recien investigacion haci door di nan studiantenan, como cu esaki lo por duna un sosten y apoyo inmenso riba tur clase di asunto, desaroyo, y informacion balioso riba tur clase di topico.
E ta bira un sorto di showcase pa e proyectonan di investigacion, cu esnan na Universidad di Aruba ta haciendo. Pesey awor riba Internet, Universidad di Aruba ta publica abstracto di e proyectonan aki, y ta wordo poni den repositorio di nan na idioma Papiamento, Ingles, y Hulandes. E repositorio por ser haya na e website aki:
E siman aki, DIARIO a tuma nota cu Universidad di Aruba a publica e investigacion haci door di studiante Jeltzlin Semerel, encuanto e mata di Aloe Vera, cu ta reconoci pa su propiedad medicinal y aplicacionnan di cosmetica, basa riba su gel.
E investigacion di Semerel yama oficialmente “E Balor di Aloe barbadensis Miller, (Aloe vera)
Procesamento di Desperdicio”. E investigacion a wordo haci door di Jeltzlin Semerel, Nigel John, Wim Dehaen y Pedro Fardim. Por check e investigacion direct na e website aki:
E mata di Aloe vera ta reconoci mundialmente pa su propiedadnan medicinal y aplicacionnan cosmetico basa riba su gel, manera shampoo, habon, y crema contra solo. Sinembargo, e aumento den demanda di Aloe vera gel ta nifica un aumento di resto di e producto, su desperdicio, cu actualmente ta wordo manda pa dump of ta wordo uza como fertilisante. Esaki ta un problema, pasobra un facilidad di procesamento pa gel di Aloe vera por genera te cu 4.000 kilodi desperdicio pa luna!
Mester considera un sistema di maneho mas sostenibel pa e material di desperdicio aki, como cu e desperdicio tin impacto negativo riba medio ambiente y sociedad. Ehempelnan ta e emission di gas cu ta contribui na cambio di clima y contaminacion di tera y awa den tera.
E articulo di investigacion aki ta describi investigacion anterior cu a explora aplicacion di desperdicio di procesamento di gel di Aloe vera:
(*) E desperdicio di Aloe vera ta rico na vitamina, componente medicinal y polimero natural cu por wordo aplica den proceso medico, manera tratamento di herida, reconstruccion di cuero, y sistemanan pa entrega di remedi pa trata malesa manera Alzheimer.
(*) E componente bioactivo di Aloe vera (manera aloe-emodin, aloin y aloe resin) por ta beneficioso den industria cosmetico y farmaceutico pa contribui na tratamento di cancer y Covid-19.
(*) E desperdicio di Aloe vera tambe por wordo converti den productonan manera cuminda pa bestia y aquacultura. Door di reduci e produccion di cuminda pa bestia atraves di e reuzo di desperdicio di Aloe vera, e carbon-footprint di e proseconan lo por wordo reduci y esaki lo yuda pa combati cambio di clima.
(*) Desperdicio di Aloe vera por wordo uza pa aplicacionnan ambiental, manera kita metalnan pisa of tiñanan y otro contaminantenan for di awa contamina.
(*) Desperdicio di Aloe vera tambe por wordo uza manera un fuente di energia den produccion di combustibel biologico (manera den produccion di bioethanol, biogas, y ‘syngas’ manera hydrogeno).
Door di uza e balor agrega di e desperdicio, e produccion di gel di Aloe vera por wordo integra den un economia circular. Esaki por beneficia e sociedad y economia di Aruba... y agrega mas balor na e mata di Aloe vera!
