Ministro Geoffrey Wever
ORANJESTAD (AAN): Minister Geoffrey Wever recientemente tabata tin e honor di habri e workshop "Economics of Mutuality" cu participacion di comerciantenan na Universidad di Aruba. Companianan ta bao di un presion creciente di empleado-, consumidor-, inversionista- y gobiernonan pa incorpora practicanan sostenibel. "Crea balor" mester ta basa riba beneficio di crea solucionan pa e ser humano y medio ambiente, y no solamente beneficio financiero.
E workshop “Business Leaders Shape Society Now and in the Future” ta forma parti di un programa dedica na Economics of Mutuality. Economics of Mutuality ta un innovacion riba tereno di maneho y inversion pa guia organizacionan den nan transicion pa asina crea un balor mas grandi pa e ser humano y medio ambiente y tambe mas ganashi. Esaki ta un situacion “win-win” pa tur, un beneficio mutuo pa tur stakeholders.
Den 2019 e economia di Aruba tabata 8.3x biaha mas grandi cu e economia den 1986 midi den balor nominal. Pero si nos wak e balor nominal di e economia reparti over di tur habitante - Producto Interno Bruto per capita - esaki tabata 4.5x biaha mas grandi cu den 1986. Esaki ta menos cu e crecemento di e economia.
Pa loke ta trata e balor real di e economia, of e calidad averahe di bida, esaki den 2019 esaki tabata 2.5x biaha mas grandi cu 1986 - dus un diferencia grandi. Esaki ta mustra cu aunke e economia di Aruba a crece, e calidad averahe di bida di nos habitantenan a keda hopi atras. Desde 2000 e desaroyo di e Producto Interno Bruto per capita real of calidad averahe di bida ta stagna.
Mirando e necesidad y urgencia pa un modelo economico duradero, minister Geoffrey Wever a informa e participantenan cu a traha un 'National Action Plan 2023-2025 Aruba's Transition To A Sustainable And Inclusive Economic Model'. Recientemente esaki a worde aproba door di conseho di minister y a ser presenta na Parlamento 30 di maart y despues pa pueblo.
Ta importante pa hiba e debate cu no por sigui desaroya nos economia na e mesun manera cu a haci e ultimo 32 añanan si cifranan oficial ta demostra cu e calidad di bida di nos ciudadanonan ta worde negativamente afecta.
Minister Geoffrey Wever ta gradici HopeAruba Movement Foundation pa e invitacion y por sigui conta cu su cooperacion pa traha hunto pa un Aruba duradero.
