Minister Ursell Arends a presenta su vision y maneho ambicioso pa nos adultonan mayor

E mensahe clave na Foro Nacional ta e enfasis ariba un compromiso colectivo

ORANJESTAD (AAN):  Den e discurso di apertura di Foro Nacional pa Adulto Mayor, Minister di Transporte, Integridad, Naturalesa y Asuntonan di Adulto Mayor, sr. Ursell Arends a presenta su vision y maneho ambicioso pa nos adultonan mayor. Poniendo enfasis ariba un compromiso colectivo pa e bienestar di nos adulto mayor.

           Minister Arends a cuminsa ta imagina un Aruba unda individuonan di 60 aña of mas por biba un bida saludabel, participativo y digno. Indicadornan clave di bienestar ta inclui autonomia, mobilidad y cuido adecua, reconociendo e impacto significante di embehecimento riba condicionnan socioeconomico.

            Reconociendo e retonan presenta den embehecimento, Minister a pone enfasis riba e necesidad pa un evaluacion critico di strategianan, pa balansa y sostene e gastonan creciente relata na cuido door di embehecimento. Investigacionnan tocante eficiencia den facilidadnan di cuido y evaluacion di e sistema di subsidio actual ta na caminda.

            Adicional na esaki, e maneho ta enfoca riba crea servicionan adapta y accesibel pa e adulto mayor pa e crecemento drastico den e grupo demografico aki. Esfuersonan desde 2021 ta inclui e establecimento di Directie Ouderenzaken, programanan di Centro di Barionan y reforsamento di posicionnan di NGO's.

            Minister a enfatisa e necesidad di un perspectiva colectivo riba embehecimento, cambiando di un enfoke medico pa un enfoke social. E cambio social aki ta rekeri un compromiso nacional, no solamente un responsabilidad di gobierno.

            Recientemente, Ministerio di Adulto Mayor a conduci un "Quick Scan" bou di guia di Professor Anne-Mei The, revelando problemanan preocupante manera lista di espera largo pa facilidadnan di cuido, abuso y negligencia, vulnerabilidad social, y persona mayor bibando den pobresa.

            E mensahe ta cla: accion inmediato ta necesario. "No tin tempo pa perde y pasonan tin cu wordo tuma:  nos ta construyendo e brug mientras nos ta crusando. Y pa logra esaki ta exigi un cambio di enfoke y perspectiva." - Minister Ursell Arends a bisa.

            Durante e Foro Nacional pa Adulto Mayor lo trata diferente tema importante, manera tendencianan demografico, vivienda, servicionan di bienestar y cuido como tambe participacion civico.    Den cuadro di esaki a invita un variedad di representante gubernamental como tambe no gubernamental pa forma un dialogo informativo y constructivo.