Cu e meta di trece trankilidad den SABA:
ORANJESTAD (AAN) – Minister Ursell Arends, titular di Transporte, Integridad, Naturaleza y Asuntonan di Adulto Mayor, tabata na encargo di e conferencia di prensa di Gobierno, di Diaranzon di e siman aki.
E dignatario a elabora tocante su Nota di Maneho pa Adultonan Mayor, y a referi na e inkietud cu tin den pueblo encuanto e maneho aki.
Minister Arends te kere cu e discusion publico y politico cu ta wordo hiba na e momentonan aki, no ta bay conduci na ningun ganador; perdedor so ta bay tin y pesey e kier a para keto riba e nota di maneho cu a wordo presenta den Parlamento, y a informa Parlamento riba e maneho cu gobierno ta hibando y e direccion cu su persona, como Minister, ta encamina pa loke ta trata e maneho di Asuntonan pa Adulto Mayor.
El a bisa cu mas cu tur cos, e ta tuma nota cu eyfo opositornan politico ta sali bisa cu no tin vision pa loke ta trata e maneho pa Asuntonan di Adulto Mayor, y pesey el a trece e tema aki den conferencia di prensa, pa na final di esaki trece trankilidad cerca e trahadornan di SABA pero tambe pa e adultonan mayor cliente di SABA y nan famianan.
E mandatario a agrega cu manera Parlamento di Aruba a duna gobierno e instruccion, a base di un mocion, nan por sinta na mesa y manera hendenan grandi y dirigentenan responsable, yega na un solucion cu ta conduci na trankilidad di e trahadornan, e clientenan di SABA y nan famianan, pa nan por tin e seguridad riba e cuido cu nan tin derecho riba dje. Asina Arends a reitera.
Minister Arends a señala cu e nota di maneho ta basa riba tres prioridad. Esun prome ta un miho reparticion di e gastonan y ora di papia di esey no por enfoca solamente riba e 194 pashent/clientenan cu tin aworaki den SABA, pero tin 620 adulto mayor cu mester di cuido na e momentonan aki y cu pa por yega akinan, mester tin reparticion di gastonan.
E mandatario a comenta cu ora cu e tabata den Sala di Parlamento, for di eynan mes a bin un mocion dilanti unda cu ta pidi gobierno pa den un periodo di seis luna bin cu un plan of un conseho pa sondea e oportunidad, si tin espacio pa bin cu un 'persoonsgebondensubsidie' cu ta locual awo ta encamina, y cu tambe por inclui den e parti di reparticion di gasto.
