Minister Tjon a reuni cu hunta di maneho di Stichting voor Verstandelijk Gehandicapten Aruba

ORANJESTAD (AAN) - Riba dia mundial di down syndroom, Minister di Husticia y Asuntonan Social Sr. Rocco Tjon,

a haya un recorido y a reuni cu e hunta di maneho di “stichting voor verstandelijk gehandicapten Aruba” (SVGA). A bishita tur e diferente departamentonan cu ta resorta bou di SVGA, y a haya e oportunidad di papia cu e trahadonan cu ta haci e trabou aki dia aden y dia afo cu hopi pasion y amor pa nos hendenan cu limitacion.

            E mainta a cuminsa cu un recorido na scol “duna un man”, caminda a haya un splicacion amplio di e cabesante di e scol. E cabesante a splica con, a base di un enseñansa mas individualisa, ta trata na yuda e muchanan aki. Siguientemente a bishita “Bibito Pin” y “Man na Obra”.

            Segun Minister Tjon, el a keda hopi impresiona di mira con e lidernan ta guia e gruponan aki, tambe a expresa cu e programanan cu ta ofrece ta uno hopi diversifica, caminda e meta final ta, pa percura cu e clientenan aki por haya un afiliacion sea serca un otro tipo di enseñansa of ta yudanan re-integra den e mercado laboral.

            Segun e Mandatario, e ta algo di aprecia di wak con e trahadonan ta duna tur di nan banda pa percura cu nan por guia nan clientenan y asina brinda nan un oportunidad husto, como tambe un trabou sigur, pues esaki ta di balor agrega pa Aruba. Durante e recorido aki, loke tambe a resalta ta con limpi cada edificio, cu ta resorta bou di e fundacion aki ta. Esaki ta un indicacion di e seriedad cu e bestuur como tambe e lidernan y maestronan tin pa nan trabou.

            Cada departamento di SVGA ta traha cu otro gruponan, pues pa e motibo ey e clientenan ta wordo gescreen a traves di un grupo di profesionalnan cu ta traha na SVGA. E grupo di profesionalnan aki ta consiti di diferente specialismo, manera ortopedagogico, logopedista, psicologo y a base di e screening aki nan ta wak ki programa ta fit miho cu cada cliente.

            Algo bunita cu a resalta, ta cu tin diferente compania den sector priva cu ta duna un aporte na e diferente programanan di e diferente departamentonan. No solamente ta aporta na un manera financiero, pero ta aporta tambe den e sentido cu ta duna e clientenan aki un oportunidad di por forma parti di nan compania door di haci cierto trabounan, pues ta algo di aprecia.

            Por ultimo, Minister Tjon a indica cu ta wak bek na un dia sumamente fructifero, caminda a reuni tambe cu e hunta di maneho di SVGA, tocante diferente puntonan di atencion como tambe nan retonan di mas grandi pa e añanan binidero. Pues, di parti di Ministerio di Husticia y Asuntonan Social lo wak na ki forma por percura pa dunanan e yudansa cu nan tin mester pa por surpasa e retonan aki.