Minister Thijsen ta gradici e tres studiementor cu ta finalisa nan trabao na Hulanda

ORANJESTAD (AAN)/Den Haag  – Durante di un encuentro ameno na Arubahuis a gradici y despedi di tres studiementor cu a stop cu nan trabao.

Ta trata di studiementor Swinda Venhorst-Thijsen, Lourdes Bramble-Tromp y Omar Besaril.

            Tanto Swinda Venhorst-Thijsen como Lourdes Bramble-Tromp ta stop, pasobra nan ta baha cu pensioen, mientras cu Omar ta stop, pasobra ela haya un promocion den su trabao cu ta exigi hopi mas dje y asina elo no por eherce e trabao di studiementor satisfactoriamente. Swinda Venhorst-Thijsen tabata studiementor pa e region di Brabant y Limburg cu ciudadnan di estudio manera Tilburg, Breda, Den Bosch den Brabant y Maastricht, Heerlen, Sittard y Venlo den Limburg. Lourdes Bramble-Tromp tin e ciudadnan Alkmaar, Haarlem y Amsterdam y alabes e ta guia tambe studiantenan den e region di Enschede, Deventer y Zwolle. Omar Besaril tabata encarga cu e region di Utrecht.

            Minister Plenipotenciario mr. Ady Thijsen den su discurso a para keto na e importancia di e trabao di un studiementor den e guia di nos studiantenan. E guia aki segun e mandatario ta importante pa motibo cu Pais Aruba ta inverti hopi den nos hobennan pa sigi un estudio avansa pa bira un professional y pa bolbe bek y aporta na bienestar di Aruba. ‘Den e proceso aki e studiementor ta hunga un rol hopi importante, mescos cu e departamento di enseñansa di Arubahuis.

            Cu nan experticio e studiementor ta duna guia, aviso y sosten na nos studiantenan una bes cu nan pone pia na Hulanda. Un trabao cu ta bin cu hopi reto. Bo ta confronta situacionan comun bou di studiantenan y otro biaha situacionnan singular. Otro aspecto di e trabao como studiementor ta cu tur studiante pa prome biaha ta leu for di nan cas, riba nan mes sin nan mayornan unda nan por cai bek pa conseho of consuelo. Como studiementor bo no ta mama ni tata di e muchanan, pero toch bo ta sinti cu e sentimiento aki tey, pa eroneo cu e por sona,’ asina minister Thijsen a bisa.

            Alabes e mandatario a sigi bisa cu ta sondea un manera pa intensiva e guia di nos studiantenan, pa asina Aruba tin mas bista riba nan, na momento cu nan caba nan estudio y mira pa nan regresa Aruba. Minister Thijsen: ‘Ta importante pa nos hobennan regresa Aruba, pasobra door di e “vergrijzing” Aruba mester di hopi trahador/profesional den futuro. Mirando cu e sector publico ta limita, lo mester bin mas initiativa di e sector priva por ehempel riba salario y condicionnan secundario di trabao cu ta atractivo y competitivo cu e mercado di labor Hulandes. Mi ta convenci cu asina nos por logra cu nos profesionalnan bai bek Aruba.’

            Minister Thijsen den su discurso a dirigi su mes na e tres studiementor na unda a vocifera su aprecio grandi pa tur tres, pa nan pasion, amor y dedicacion na nos studiantenan; cada uno na nan manera. ‘Tin biaha ta presenta circumstancianan inespera, manera e caso di studiementor Jeannette Wesseling cu a fayece y Arubahuis a haci un apelacion riba Swinda pa temporalmente tuma e region di Arnhem, Nijmegen y Wageningen over. Aunke cu e tarea a bira hopi, ningun dia nos a tende un grito di Swinda. Banda di esaki Swinda Venhorst casi tabata un mama pa e studiantenan. E dedicacion aki semper por a conta riba hopi aprecio di su studiantenan, sabiendo tambe cu semper nan por a conta riba Swinda,’ asina sr. Thijsen a bisa.

            Pa loke ta Lourdes Bramble Minister Thijsen a bisa cu e studiantenan tin un cariño enorme pa Lourdes. Thijsen: ‘Esaki tabata bisto tambe den e respaldo e aña aki ora cu Lourdes a ricibi un condecoracion real pa tur loke el a haci riba terenonan social y cultural. Por ultimo Lourdes semper tey pa su studiantenan, pero si un studiante Arubiano, cu no tin Arubalening; ta un freemover acerca Lourdes pa ayudo, semper e por conta riba e atencion di Lourdes y su disponibilidad pa yuda.’

            Minister Thijsen a bisa cu aunke cu Omar Besaril no a eherce e trabao di studiementor mesun largo cu Swinda y Lourdes, por a mira un persona hopi dedica na su studiantenan den e region di Utrecht cu hopi reto, principalmente riba e tereno di camber y vivienda.

            Finalmente Minister Thijsen a gradici Swinda, Lourdes y Omar den nomber di Gobierno di Aruba, Minister di Enseñansa di Aruba y sigur di Arubahuis inmensamente pa tur e añanan cu nan a dedica – banda di nan trabao, den nan tempo liber – na nos studiantenan. Como aprecio pa nan trabao Minister Thijsen a haci entrega di un plakkaat na e studiementornan.

E potretnan ta cortesia di Arubahuis