Minister Thijsen na recepcion di despedida pa Secretario di Estado Van Huffelen

ORANJESTAD (AAN) Den Haag: Na Nieuwe Kerk na Den Haag a tuma lugar un recepcion pa tuma despedida di Alexandra van Huffelen como Secretario di Estado pa Asuntonan di Reino y Digitalisacion.

Na e ocacion aki Minister Plenipotenciario mr. Ady Thijsen a gradici Alexandra van Huffelen pa e bunita cooperacion durante di e periodo cu e tabata Secretario di Estado. Tambe Minister Thijsen a gradici Alexandra van Huffelen pa su comprension y su amor y afecto grandi pa e parti Caribense di Reino Hulandes. Sr. Thijsen a desea señora Van Huffelen tur clase di exito den loke elo bai haci despues di e funcion di Secretario di Estado. 

Durante e programa oficial un video a wordo pasa cu palabranan di gratitud y aprecio di mandatarionan di e parti Caribense di Reino, na unda tambe Prome Minister di Aruba mr. Evelyn Wever-Croes tabata tin un mensahe pa Alexandra van Huffelen, na unda tambe e prome mandatario di Aruba a gradici Secretario di Estado van Huffelen pa e cooperacion entre Hulanda y Aruba. 

Den su discurso Alexandra van Huffelen a mira bek riba e dos aña y mey cu e tabata den e funcion aki. El a para keto na su bishitanan na y su intercambionan cu e mandatarionan di e parti Caribense di Reino. Tambe e trabaonan cu el a logra realisa riba e agenda di digitalisacion. E mandatario a bisa su hopi trabao a wordo haci, pero cu lastimamente door di e caida di e Gabinete Rutte IV, tin proyectonan cu no por e keda finalisa. Finalmente el a bisa di ta spera cu su sucesor sigui riba e mesun caminda pa loke ta e Relacionnan den Reino y Digitalisacion. 

E recepcion a sigi den un esfera hopi ameno cu musica di Juni Juliet. 

E potretnan ta cortesia di Arubahuis