Minister Thijsen na celebracion dia di Emancipacion di Eindhoven

 ORANJESTAD (AAN)/Den Haag – Eindhoven a tuma e iniciativa pa bin cu nan propio Dia di Emancipacion pa e comunnidad Caribense.

Fundacion Gedeeld Verleden, Gezamenlijke Toekomst a tene un “Dutch Caribbean United Emancapation Day” evento cu a conta cu presencia di Minister Plenipotenciario di Sint-Maarten Gracita Arrindell, Minister Plenipotenciario demisionario di Aruba mr. Ady Thijsen, wethouder di municipio di Eindhoven Samir Toud y staatsraad pa Curaçao na Raad van State Paul Comenencia.

            Na e ocacion aki demisionario minister Thijsen a hiba palabra unda ela cuminsa na bisa cu e iniciativa pa bin cu un propio dia di Emancipacion pa e comunidad Caribense ta hopi bon, pasobra mester constata cu e sclavitud den e parti Caribense di Reino ta otro. Segun sr. Thijsen despues di e disculpa di Gobierno Hulandes y Rey Willem Alexander pa e historia di sclavitud Hulandes, hopi cos a pasa. ‘Na Aruba a bin mas atencion y reconocemento.

            Pa tempo largo Arubianonan no tabata papia si nan ta descendiente di esclavo of di shonnan, segun historico Adi Martis den e podcast pa Caribische Netwerk titula “Arubaanse roots: Het verborgen slavernijverleden”. Sr. Martis ta sigui bisa cu personanan en general ta papia manera cu sclavitud na Aruba tabata mescos cu na Surnam, Curaçao of Merca. Pero segun e historico esaki no ta cuadra cu e hecho cu e situacion na Aruba tabata otro. Aruba den comparacion cu Curaçao y Sint-Eustatius relativamente y absolut tabata tin menos esclavo. Tambe e constelacion di e poblacion di esclavo y nan circunstancia di bida tabata otro y segun sr. Martis ta haci esaki unico,’ asina sr. Thijsen a bisa den su discurso

            E mandatario a sigui cita e historico cu ta bisa den su podcast cu Aruba tabata tin un escala chikito cu a haci e situacion mas personal. Sr. Martis ta sigi splica cu e esclavonan tabata haci trabao di cas y tambe tabata traha den cunucu. Algun esclavo tabata tin tereno y cas, sigur no por compara esaki cu e situacion na Surnam, segun Adi Martis.

            Minister Demisionario Thijsen a bisa despues di e komma den e disculpa di Gobierno di Hulanda, ta importante pa bin mas atencion pa e consecuencianan di sclavitud pa e poblacion di e parti Caribense di Reino, por ehempel riba tereno di enseñansa y salubridad. Sr. Thijsen: ‘Banda di esey mi ta di opinion cu na Hulanda mes lo mester bin mas concientisacion bou di e poblacion riba e rol di Hulanda den sclavitud.

            Pa cuminsa na scolnan. E lo mester ta un dialogo habri, sin punta dede y no culpa hendenan pa e actonan di pasado. Hecho ta cu sclavitud te e dia di awe tin su efectonan den e sociedad Hulandes. Djis pensa riba discriminacion y racismo. Desaroyonan cu Hulanda no por cera wowo pa nan, pero mester bin cu pasonan concreto pa duna contenido na e komma di ex-Prome Minister Rutte. Nos punto di bista ta cu descendiente di esclavo lo mester haya e oportunidad pa desaroyo nan mes na un mihor calidad di bida, den tur aspecto manera enseñansa, salubridad, mercado laboral, social y financiero.

            Pa e sosten aki no mester tin limitacion, mirando cu e sufrimento no por keda expresa den un suma di placa,’ tabata palabranan di demisionario Minister Plenipotenciario Ady Thijsen.

Finalmente minister demisionario Thijsen a sorprende sr. Jacintho Zimmerman di Fundacion Gedeeld Verleden, Gezamenlijke Toekomst cu un plakaat di reconocemento como digno baluarte na Eindhoven pa su contribucion na e comunidad di e islanan den Reino Hulandes riba tereno cultural.

            Despues e programa a continua cu discursonan di entre otro wethouder Samir Toud y Paul Comenencia. Tambe e programa a consisti di baile di grupo Flamboyant y canto di e Arubiano Aymar Torres.

 E potretnan ta cortesia di Arubahuis