ORANJESTAD (AAN)/Den Haag – Minister Plenipotenciario mr. Ady Thijsen a presencia e ultimo dia di Vier Daagse di Nijmegen como invitado special di Stichting 4Daagse di Nijmegen.
Esaki ta e di 105 edicion di e 4Daagse di Nijmegen.
For di e VIP-tribuna Minister Thijsen por a mira e grupo di participantenan di e 4Daagse canando nan ultimo meternan riba e “Via Gladiola” pa yega final di e vierdaagse. Esaki acompaña cu hopi musica y centenares di bishitante canto di caminda apoyando e participantenan. Dos banda tabata zorg pa musica, mientras den e vierdaagse mes tabata tin gruponan di fanfaria militar, di polis y di Post NL for di Hulanda y tambe fanfarianan for di otro paisnan, manera Inglatera y Suecia.
Na e sitio aki Minister Thijsen tabata tin e oportunidad pa saluda algun Arubiano cu tambe a cana e vierdaagse, manera ta e caso di Margarita Flanders cu e aña aki a cana e vierdaagse pa di 25 biaha. Razon pa Minister Thijsen a haci entrega di un bunita boeket di flor y a felicita señora Flanders cu e logra grandi aki. Otro Arubiano cu Minister Thijsen a topa ta señora Silvia Lewis cu a aña aki ta participa pa di 24 biaha.
E aña aki atrobe un grupo di duaneronan Arubiano a participa hunto cu Douane Nederland. Nan ta Marlon Ruiz, Giovanni Davelaar y Gerold Tromp. Marlon Ruiz e aña aki a cana e vierdaagse pa di 17 biaha. Pa Giovanni Davelaar esaki ta su di 15 vierdaagse, mientras cu Gerold Tromp a participa e aña aki pa di seis biaha.
Na Fletcher Landgoed Hotel Holthurnsche Hof a tuma lugar e entrega di medaya na e participantenan di Douane Nederland, entre nan e tres duaneronan Arubiano, tambe hunto cu duaneronan for di diferente otro paisnan.
Minister Thijsen un biaha mas a felicita e grupo di duaneronan Arubiano pa nan logro. Tambe cu nan participacion cu nan paña y bandera di Aruba, sigur a yuda na promove nos isla na un evento asina grandi.
E potretnan ta cortesia di Arubahuis
https://diario.aw/categories/noticia/general/minister-thijsen-a-presencia-e-ultimo-dia-di-vier-daagse-di-nijmegen#sigProIdb9aabc78f2
